Գիտնականները նախազգուշացրել են, որ շուտով Երկրի վրա «անտանելի» շոգ կլինի: Այս մասին գրում է Sky News- ը:
Փորձագետները հիշեցնում են, որ վերջերս Կանադայի Լիտոն գյուղում գրանցվեց այս տարածաշրջանի համար աննախադեպ ջերմաստիճանի ռեկորդ՝ 49,6 աստիճան, ինչը պատճառ դարձավ անտառային հրդեհների և հանգեցրեց հարյուրավոր մարդկանց մահվան ԱՄՆ-ում և Կանադայում: Գիտնականների կարծիքով մոլորակն անցել է շեմը, որից հետո աննշան տաքացումն անգամ հանգեցնում է ջերմաստիճանի ծայրահեղ աճի:
Վիճակագրական վերլուծության արդյունքում փորձագետները եկել են եզրակացության, որ այդպիսի շոգ սովորաբար լինում է հազարամյակների կտրվածքով, և գլոբալ տաքացման բացակայության դեպքում դա կլիներ 150 անգամ ավելի հազվադեպ, կարծում են World Weather Attribution-ի եղանակային երևույթներն ուսումնասիրող խմբի փորձագետները: «Չի բացառվում, որ այսօր մենք ականատես ենք ծայրահեղ շոգի, որը սպասվում էր կլիմայի շատ ավելի բարձր տաքացման դեպքում», - ասել է Ֆրեդերիկ Օտոն Օքսֆորդի համալսարանից:
Նիդեռլանդների Թագավորական օդերևութաբանական ինստիտուտի մասնագետ Սյուկյե Ֆիլիպի կանխատեսման համաձայն, ապագայում Երկրի վրա նման տապը շատ ավելի հաճախ կլինի, չնայած նախկինում դա «անհնար էր»: Գիտնականները եզրակացրել են, որ եթե մոլորակի վրա ջերմաստիճանը մինչև 2040 թվականը բարձրանա միջինը երկու աստիճանով, ապա կանադական Լիտոնում տեղի ունեցածի նման կատակլիզմներ տեղի կունենան յուրաքանչյուր 5-10 տարին մեկ:
Ավելի վաղ Մելբուրնի Մոնաշի համալսարանի և Չինաստանի Շանդունի համալսարանի գիտնականները հաշվարկել էին, որ տարեկան մի քանի միլիոն մարդ է մահանում գլոբալ տաքացման պատճառով: Նրանք վերլուծել են բոլոր մայրցամաքների 43 երկրների տվյալները և պարզել, որ մրսածությունից մահացությունը 0,5 տոկոսով հազվադեպ է լինում, իսկ շոգից մահացությունների թիվն աճել է 0,2 տոկոսով: Շոգից մահացության ամենաբարձր ցուցանիշը գրանցվել է Եվրոպայում, ցրտից` աֆրիկյան երկրներում: