Իսպանիայի իշխանությունները համաձայնեցրել են փողոցում պարտադիր դիմակ կրելու որոշման չեղարկումը, որն ընդունվել էր անցյալ տարվա դեկտեմբերի վերջին՝ երկրում նոր կորոնավիրուսի տարածումը զսպելու նպատակով։ Այս մասին երկուշաբթի օրը հայտնել է Թագավորության առողջապահության նախարարությունը։
Ըստ նախարարության՝ գերատեսչության և մարզային իշխանությունների ներկայացուցիչները «հավանություն են տվել փողոցում դիմակների օգտագործման [կանոնների] փոփոխությանը»։ Երեքշաբթի օրը Թագավորության Նախարարների խորհուրդը նույնպես պետք է տա իր հավանությունը։ Որոշումն ուժի մեջ կմտնի հինգշաբթի օրը՝ կառավարության պաշտոնական տեղեկագրում հրապարակվելուց հետո։
Իշխանությունները նաև որոշել են ավելացնել Իսպանիայի ֆուտբոլի և բասկետբոլի առաջնություններին և այլ խոշոր սպորտային միջոցառումներին ներկա գտնվող երկրպագուների թիվը։Մասնավորապես, փակ տարածքները, որտեղ անցկացվում են հանդիպումներ, այժմ կարող են լրացվել մինչև 75%՝ 50%-ի փոխարեն: Եթե միջոցառումը տեղի է ունենում բաց տարածքում, ապա երկրպագուների թիվը պետք է սահմանափակվի 85%-ով՝ առավելագույն հնարավոր այցելուների թվի 75%-ի փոխարեն:
47 միլիոն բնակիչ ունեցող Իսպանիայում համաճարակի սկզբից ի վեր հայտնաբերվել է վարակման ավելի քան 10 միլիոն դեպք, ավելի քան 94 հազար հիվանդ մահացել է։ 2020 թվականի դեկտեմբերի վերջին երկրում սկսվել է պատվաստումների արշավ։ Այս պահին 12 տարեկանից բարձր իսպանացիների 90%-ն արդեն ամբողջությամբ պատվաստված է կորոնավիրուսի դեմ։
Ավելի վաղ, Covid-ի օմիկրոն տարբերակի առաջացման ֆոնին Իսպանիայում կրկին աճեցին վարակի տարածման տեմպերը։ Արդյունքում հանրապետությունում գրանցվեց վարակվածների օրական աճի հակառեկորդ։ Այնուամենայնիվ, ենթադրվում է, որ թագավորությունն արդեն անցել է Covid-ի ընթացիկ ալիքի գագաթնակետը։