Պղծված հայկական գերեզմանատան տարածքում ցրված են մնացել տապանաքարեր ու մարդկային ոսկերներ։
Թուրքիայի տարածքում գտնվող Վանի նահանգի Տուշպա շրջանում գտնվող հայկական գերեզմանատունը քանդվել է բուլդոզերով։ Ինչպես տեղեկացնում է թուրքական Bianet լրատվականը, Կալեցիկ շրջանը, որը հայտնի է նաև որպես Լեզք, 1915թ․ Ցեղասպանությունից առաջ եղել է հայկական թաղամաս։
2011 թվականին Վանում տեղի ունեցած երկրաշարժից հետո Բնակարանային գործակալությունը այստեղ կառուցեց նոր բնակելի թաղամաս։
Ըստ Մասաչուսեթսի Mesopotamia Agency -ի, վանդալիզմի ակտը կատարվել է օրեր առաջ: Այն կազմակերպել էր մի մարդ, ով պնդում էր, որ այդ հողակտորի սեփականատերն է: նախկին գերեզմանատան տարածքում ցրված են տապանաքարեր ու մարդկային ոսկորներ։
Օգոստոսի 24 -ին «Ժողովուրդների դեմոկրատական կուսակցության» պատգամավոր Մուրատ Սարիսաչը միջադեպի հետ կապված խորհրդարանական հարցում ուղարկեց:
«Լուսանկարները ցույց են տալիս, որ գերեզմանները քանդվել են, և տասնյակ ոսկորներ ցրված են մնացել տեղում», - ասել է Սարիսաչը:
Պատգամավորը նշել է, որ նման արտակարգ դեպքեր Վանում բավականին հաճախ են լինում: Սա, նրա խոսքով, վկայում է այն մասին, որ կառավարությունն անհրաժեշտ միջոցներ չի ձեռնարկում պատմական հուշարձանները` վանքերն ու գերեզմանատները պաշտպանելու համար:
2017 – ին Վանի նահանգի Դիլկոյում գտնվող հայկական գերեզմանատան տեղում զուգարաններ, հանդերձարաններ և ավտոկայանատեղի կառուցվեցին, հիշեցրել է պատգամավորը:
«Գանձ որոնողների և գործադիր իշխանության անփութության պատճառով Վանի և նրա շրջակայքի պատմամշակութային կառույցները վնասվել են», - նշել է Սարիսաչը:
Նա հարցրել է Թուրքիայի փոխնախագահ Ֆուաթ Օքթային, թե ինչու իշխանությունները չեն պաշտպանում հայկական գերեզմանատները, ինչպես նաև մշակութային ու կրոնական ժառանգությունը: Սարիչասը նաև հետաքրքրվել է Օքթայից, թե արդյոք կառավարությունը նախատեսում է պահպանել և վերականգնել մշակութային ժառանգության վայրերը, և արդյո՞ք իրականացվել է տարածաշրջանի հայկական վանքերի և այլ մշակութային արժեքների գույքագրում: