Ծնվել է աշխարհում առաջին երեխան, որի բեղմնավորման համար օգտագործվել է նոր տեխնոլոգիա՝ փոխանցելով երեք մարդու ԴՆԹ: Նորածին Աբրահիմ Հասանը 5 ամսական է: Նա ունի երեք մարդու ԴՆԹ՝ մոր, հոր և դոնորի:
Դոնորի գենետիկ ինֆորմացիան պետք է օգնի երեխային խուսափել մոր գեները ժառանգելուց, որոնք կարող են հանգեցնել հիվանդության զարգացման:
Տեխնոլոգիան թույլ է տալիս հազվագյուտ գենետիկական հիվանդություններով ծնողներին առողջ երեխա լույս աշխարհ բերել: Բժիշկները կարծում են, որ այդ մեթոդիկան նոր դարաշրջան է բացում բժշկական հետազոտությունների համար եւ կարող է օգնել շատ մարդկանց:
Երեխայի ծնողները Հորդանանից են: Նրա մայրը Լեյի համախտանիշի կրող է, որը ախտահարում է կենտրոնական նյարդային համակարգը: Ընդ որում, մայրն առողջ է, սակայն գենետիկ մուտացիայի պատճառով նրա երկու երեխաներն արդեն մահացել են:
Հիշեցնենք, որ Մեծ Բրիտանիայի խորհրդարանն անցյալ տարի հավանություն էր տվել բեղմնավորման տեխնիկաներից մեկին, որին կարող են մասնակցել 3 մարդ: Բեղմնավորվում է միանգամից մի քանի ձվաբջիջ, իսկ որոշ էմբրիոններ ոչնչացվում են: Սակայն մուսուլման զույգը հրաժարվել էր այդ տեխնիկայից կրոնական պատկերացումներից ելնելով:
Ի վերջո ամուսինները դիմել էին Նյու Յորքում անպտղության բուժման «Նոր հույս» կենտրոնին:
Գիտնականները բեղմնավորման նոր մեթոդ էին մշակել, որով մոր ձվաբջջից հանում են միջուկը եւ տեղափոխում դոնորի ձվաբջիջ, որտեղից էլ հանվում էր դոնորի ձվաբջջի միջուկը: Արդյունքում ստացվել է մոր եւ դոնորի միտոքոնդրիումների ԴՆԹ-ով ձվաբջիջ: Հենց միտոքոնդրիումներն են փոխանցում Լեյի համախտանիշը: Դրանից հետո գիտնականները բեղմնավորել են նոր բջիջը հոր սերմնահեղուկով:
Ստացվել էր 5 էմբրիոն, որոնցից միայն մեն էր նորմալ զարգացել: Դա էլ տեղադրվել էր մոր արգանդում: Երեխան ծնվել էր 9 ամիս անց:
Այս մեթոդը դեռ հավանություն չի ստացել ԱՄՆ-ում, այդ պատճառով դրա համար ամերիկացի գիտնականները մեկնել էին Մեքսիկա: