Նախագահ Շահրամանյանը պետնախարար է նշանակել ԱԺ նախկին իշխող խմբակցության ղեկավարին

Նախագահ Սամվել Շահրամանյանը պետական նախարար է նշանակել Արթուր Հարությունյանին:
Արցախի Հանրապետության նախագահ Սամվել Շահրամանյանը սեպտեմբերի 18-ին ստորագրել է հրամանագիր Արթուր Իվանի Հարությունյանին պետական նախարար նշանակելու մասին:
Երկրի ղեկավարի մեկ այլ հրամանագրով՝ փոփոխություն է կատարվել «Արցախի Հանրապետության պետական նախարարի կողմից նախարարների գործունեության համակարգման մասին» Նախագահի հրամանագրում, համաձայն որի՝ պետական նախարարը համակարգելու է հետևյալ նախարարների գործունեությունը՝
1) առողջապահության նախարար.
2) արդարադատության նախարար.
3) գյուղատնտեսության նախարար.
4) կրթության, գիտության, մշակույթի և սպորտի նախարար.
5) սոցիալական զարգացման և միգրացիայի նախարար.
6) տարածքային կառավարման և ենթակառուցվածքների նախարար.
7) քաղաքաշինության նախարար.
8)ֆինանսների և էկոնոմիկայի նախարար:
Նախկինում Հարությունյանը «Ազատ Հայրենիք-ՔՄԴ» իշխող խմբակցության ղեկավարն էր։ Սեպտեմբերի 11-ին նա հրաժարականի դիմում է ներկայացրել այդ պաշտոնից, որն, ըստ օրենքի, ընդունել է այսօր խորհրդարանի նախագահը։