Երևանը պատրաստվում է տարվա ամենասպասված մշակութային իրադարձություններից մեկին՝ «Թանգարանների գիշեր»-ին, որը տեղի կունենա մայիսի 16-ին։ Միջազգային թանգարանային օրվան նվիրված այս համաեվրոպական միջոցառման շրջանակում հայկական բազմաթիվ թանգարաններ անվճար կբացեն իրենց դռները այցելուների առջև մինչև կեսգիշեր՝ առաջարկելով արվեստի և պատմության աշխարհում սուզվելու յուրօրինակ հնարավորություն։
ՀՀ կրթության, գիտության, մշակույթի և սպորտի նախարարությունը հրավիրում է բոլորին նշելու Միջազգային թանգարանային օրը, որն ամեն տարի տոնվում է մայիսի 18-ին։ Այս տարի այն կրում է «Թանգարանները միավորում են մասնատված աշխարհը» խորագիրը՝ ընդգծելով թանգարանների առանցքային դերը՝ որպես մշակութային երկխոսության, փոխըմբռնման և համամարդկային արժեքների պահպանման ու փոխանցման հարթակներ։
Հայաստանի թանգարաններն ակտիվորեն միանում են միջազգային նախաձեռնությանը՝ կազմակերպելով բազմաբովանդակ միջոցառումների ծրագիր։ Այցելուներին սպասվում են բազմազան ցուցահանդեսներ, ուսումնական հետաքրքիր ծրագրեր, ինտերակտիվ վարպետաց դասեր, հանրային քննարկումներ և հատուկ այցելություններ՝ նախատեսված տարբեր տարիքային խմբերի և հետաքրքրությունների շրջանակ ունեցող մարդկանց համար։ Սա հիանալի հնարավորություն է նորովի բացահայտելու թանգարանային հավաքածուները և վայելելու հարուստ մշակութային միջավայրը։
Տոնական օրերի գագաթնակետը կլինի հենց «Թանգարանների գիշերը» մայիսի 16-ին։ Այդ օրը ժամը 11:00-ից մինչև 24:00-ն ծրագրին միացած թանգարաններն անվճար սկզբունքով կընդունեն այցելուներին։ Սա եզակի հնարավորություն է լայն հանրության, այդ թվում՝ ընտանիքների և երիտասարդների համար, շփվելու երկրի մշակութային ժառանգության հետ ոչ ֆորմալ և տոնական մթնոլորտում։ Այս միջոցառումների նպատակն է խթանել հասարակության հետաքրքրությունը մշակութային ժառանգության նկատմամբ, ուժեղացնել թանգարանների և հանրության միջև կապը, ինչպես նաև ընդգծել մշակույթի կարևորությունը համերաշխ և միասնական հասարակության կառուցման գործում։
Միջազգային թանգարանային օրը սահմանվել է 1977 թվականին Թանգարանների միջազգային խորհրդի (ԻԿՕՄ) կողմից՝ նպատակ ունենալով համախմբելու թանգարաններին հասարակության և մարդկության առջև ծառացած գլոբալ մարտահրավերների շուրջ՝ միաժամանակ բարձրացնելու հանրային իրազեկվածությունը թանգարանների կարևորագույն դերի մասին։ «Թանգարանների գիշեր» ծրագիրը մեկնարկել է 2005 թվականից Ֆրանսիայի մշակույթի և հաղորդակցության նախարարության նախաձեռնությամբ` ԻԿՕՄ-ի, ՅՈՒՆԵՍԿՕ-ի և Եվրախորհրդի հովանավորությամբ։ Հայաստանը միացել է «Թանգարանների գիշեր» համաեվրոպական միջոցառմանը նույնպես 2005 թվականից՝ ամեն տարի ուրախացնելով երկրի բնակիչներին և հյուրերին։
Հրավիրում ենք բոլորին միանալ տոնական միջոցառումներին և միասին բացահայտել թանգարանների միավորող ուժը։
