Ռուսաստանի Դաշնային անասնաբուժական և բուսասանիտարական հսկողության ծառայությունը (Ռոսսելխոզնադզոր) հայտարարել է Հայաստանից մի շարք գյուղատնտեսական մշակաբույսերի ներմուծման ժամանակավոր սահմանափակումների մասին։ Սույն թվականի հունիսի 3-ից արգելքի տակ են հայտնվում Հայաստանում արտադրված կամ այնտեղից առաքված կորիզապտղավոր մշակաբույսերը, սմբուկը, կարտոֆիլը և չրերը։ Այս միջոցները տարածվում են նաև նշված արտադրանքի՝ Ռուսաստանի տարածքով Եվրասիական տնտեսական միության (ԵԱՏՄ) այլ երկրներ տարանցման վրա։
Գերատեսչության պաշտոնական հայտարարության համաձայն՝ նման քայլերի պատճառը նշանակման երկրներ կարանտինային արտադրանքի փաստացի մուտքը հաստատելու արդյունավետ մեխանիզմների բացակայությունն է։ Ռոսսելխոզնադզորն իր մտահոգությունն է հայտնել, որ ներկայիս համակարգը թույլ չի տալիս պատշաճ կերպով հետևել ապրանքների ճանապարհին, ինչը ռիսկեր է ստեղծում բուսասանիտարական անվտանգության համար։
Սահմանափակումները կգործեն մինչև համապատասխան ալգորիթմի մշակումը և ներդրումը, որը կկարողանա ապահովել մատակարարումների հուսալի հսկողություն և անվտանգություն։ Ռուսական կողմն ընդգծել է, որ ստեղծված իրավիճակը մատնանշում է ՀՀ էկոնոմիկայի նախարարության կողմից հսկողության համակարգի լուրջ խնդիրները, ինչպես նաև գյուղատնտեսական արտադրության ոլորտում կարգավորման անբավարար արդյունավետությունը։
Այս որոշումը կարող է զգալի հետևանքներ ունենալ հայ արտահանողների և երկրի ագրարային հատվածի համար, քանի որ Ռուսաստանը հայկական գյուղատնտեսական արտադրանքի իրացման հիմնական շուկաներից է։ Ժամանակավոր արգելքը վտանտգում է մատակարարումների կայունությունը և պահանջում է հայկական իշխանությունների օպերատիվ լուծում՝ վստահությունը վերականգնելու և միջազգային բուսասանիտարական ստանդարտներին համապատասխանությունն ապահովելու համար։ Փորձագետները նշում են, որ նման իրավիճակը պահանջում է շուտափույթ երկխոսություն Երևանի և Մոսկվայի միջև՝ փոխադարձաբար ընդունելի լուծումներ գտնելու և տնտեսական կորուստները նվազագույնի հասցնելու համար։
