Հայաստանի վարչապետ Նիկոլ Փաշինյանը երկրի դատական և իրավապահ համակարգերի հասցեին աննախադեպ կոշտ քննադատություն է հնչեցրել՝ մեղադրելով դրանք կոռումպացվածության և պետական շահերին հակառակ գործելու մեջ։ Հայտարարություններն արվել են 2026 թվականի հունիսի 11-ին կայացած ճեպազրույցի ժամանակ, որի ընթացքում կառավարության ղեկավարը խորը դժգոհություն է հայտնել ընդդիմադիր առաջնորդների նկատմամբ կայացված արդարացման դատավճիռների առթիվ, որոնց նա համարում է հանցագործներ։
Փաշինյանի խոսքով՝ հանրությունը իրավունք ունի պատասխան պահանջել այն համակարգից, որը ինքն է ֆինանսավորում, եթե «հանցագործները»՝ նկատի ունենալով ընդդիմության ներկայացուցիչներին, ազատորեն շրջում են փողոցներում և շարունակում հանցագործություններ կատարել։ Նա առանձնահատուկ շեշտել է, որ այսպես կոչված «պատերազմի եռագլուխ կուսակցությունը» չէր կարողանա հաղթահարել ընտրական շեմը առանց ընտրակաշառքների։ «Դատաիրավական համակարգը պատասխանատվություն է կրում, թե ինչու նախորդ ընտրություններին ընտրողներին կաշառածները բանտում չեն», – վրդովված հայտարարել է վարչապետը։
Նիկոլ Փաշինյանը լիարժեք վստահություն է հայտնել, որ իր «Քաղաքացիական պայմանագիր» կուսակցությունը ստացել է ընտրողների 100 տոկոսանոց «օրգանական քվեն», մինչդեռ ընդդիմությանը տրված մյուս բոլոր ձայները հարյուր տոկոսով ընտրակաշառքների արդյունք են։ «Առանց փողի նրանց օգտին ոչ ոք չի քվեարկի։ Խախտումներ եղել են, դրանք ազդել են արդյունքի վրա, որովհետև նրանք չպետք է հաղթահարեին շեմը։ Եթե մանդատները չվերցնեն, գոնե լեգիտիմ խորհրդարան կունենանք։ Իսկ այսպես՝ ամբիոնի մոտ փողի տոպրակներ են լինելու։ Նրանք չեն անցել ԱԺ, անցել է միայն փողը», – հուզականորեն ընդգծել է Փաշինյանը։
Կառավարության ղեկավարը կրկին անդրադարձել է դատաիրավական համակարգի պատասխանատվության թեմային՝ հայտարարելով. «Համակարգը պետք է պատասխան տա։ Մինչև հաջորդ՝ 2031 թվականի ընտրությունների ձայների հաշվարկի ավարտը, նրանք պետք է բանտում լինեն, այլապես ստացվում է, որ դատաիրավական համակարգը գործում է Հայաստանի դեմ։ Պետք է արմատախիլ անել մաֆիան։ Ի՞նչ է նշանակում ընտրակաշառքի գործով արդարացնել Գագիկ Ծառուկյանին», – շարունակել է վրդովվել Փաշինյանը՝ համակարգին ուղղակիորեն մեղադրելով կոռումպացվածության մեջ։
Լրագրողների հարցին, թե արդյոք իր այս ելույթը ճնշում չէ դատարանների վրա և անմեղության կանխավարկածի խախտում, Փաշինյանը կտրականապես հերքել է այդ մեղադրանքները։ Նա հայտարարել է, որ խոսում է որպես հանրության լեգիտիմ ներկայացուցիչ, ում համբերության բաժակը լցվում է։ «Ես թույլ չեմ տա։ Թող բոլորը հաշվետվություն ներկայացնեն, թե ինչով են զբաղված։ Բոլոր կաշառակեր դատավորները բռնվելու և դատապարտվելու են», – խոստացել է վարչապետը՝ ազդարարելով դատական համակարգում սպասվող մաքրումների մասին։
