Երևանում տեղի է ունեցել մի անհանգստացնող միջադեպ, որը լուրջ արձագանք է գտել խորհրդարանական ընտրությունների նախօրեին։ Երևանի Շենգավիթ վարչական շրջանում իշխող «Քաղաքացիական պայմանագիր» (ՔՊ) կուսակցությանը հարող անձանց մեքենան վրաերթի է ենթարկել ընդդիմադիր ուժերի քարոզարշավի մասնակիցներին։ Միջադեպի հետևանքով մի քանի մարդ ծանր վնասվածքներ է ստացել և տեղափոխվել հիվանդանոց։
Դեպքի մասին առաջինը հայտնել է Երևանի ավագանու «Մայր Հայաստան» խմբակցության անդամ, ԲՀԿ ցուցակում ընդգրկված Սոնա Աղեկյանը։ Իր ֆեյսբուքյան էջում, տեսանյութի ուղեկցությամբ, Աղեկյանը գրել է. «Սիրելի հայրենակիցներ, այս պահին նիկոլականները հենց այս մեքենայով սադրիչ էին ուղարկել, ով վրաերթի ենթարկեց մեր քարոզարշավի անդամներին և հեռացավ։ Ծանր վիրավորում են ստացել քարոզարշավի մեր անդամներից մի քանիսը, այս պահին բոլորին տեղափոխում ենք հիվանդանոց»։
Միջադեպն անմիջապես հանրության և քաղաքական գործիչների ուշադրության կենտրոնում է հայտնվել։ ԲՀԿ նախագահի մամուլի խոսնակ Իվետա Տոնոյանը ևս անդրադարձել է կատարվածին՝ այն անվանելով «սահմռկեցուցիչ դեպք»։ Տոնոյանի խոսքով՝ ականատեսները վկայում են, որ սադրիչն ավտոմեքենայով մխրճվել է «Բարգավաճ Հայաստան» և «Մայր Հայաստան» կուսակցությունների թիմակիցների բազմության մեջ, ովքեր քարոզարշավ էին իրականացնում։ Նա ընդգծել է, որ մարմնական վնասվածքներ ստացած անձինք անմիջապես տեղափոխվել են հիվանդանոցներ։
«Մենք ճշտում ենք դեպքի մանրամասները, զուգահեռ հորդորելով իրավապահ մարմիններին հնարավորինս սեղմ ժամկետներում պարզել կատարվածի բոլոր հանգամանքները։ Սա սարսափելի նախադեպ է, որը վկայում է, թե ինչ աստիճանի կարող է հասնել քաղաքական անհանդուրժողականությունը և ընդդիմախոսների նկատմամբ թշնամանքը։ Առողջություն և շուտափույթ ապաքինում ենք մաղթում մեր թիմակիցներին», – գրել է Տոնոյանը։
Այս միջադեպը տեղի է ունենում երկրում սրվող քաղաքական պայքարի և աճող լարվածության ֆոնին, ինչը հաստատվում է նաև վերջին շրջանի այլ իրադարձություններով, ինչպիսիք են նախկին պաշտոնյաների ձերբակալությունները և լրատվամիջոցների գրասենյակներում կատարված խուզարկությունները։ Ընդդիմադիր ուժերը կոչ են անում մանրակրտորեն և անաչառ հետաքննել դեպքը՝ մտահոգություն հայտնելով ընտրական շրջանում բռնության և ճնշումների հետագա սրման վերաբերյալ։
Րաֆֆի Հովհաննիսյան. Այս իշխանության վերարտադրումը կնշանակի Երևանի, մարզերի և Իրանի սահմանի կորուստ