Քննչական կոմիտեի աշխատակիցները կապարակնքել են «Առինջ Մոլ» առևտրի կենտրոնի առաջին գծի ավելի քան 20 տաղավար: Գործունեության դադարեցման պաշտոնական պատճառ է նշվել համալիր փորձաքննության եզրակացությունը, որի համաձայն տարածքով անցնող բարձրավոլտ էլեկտրալարերը վտանգ են ներկայացնում քաղաքացիների համար:
Տնտեսվարողներն ու առևտրի կենտրոնի տնօրինությունը չեն համաձայնում քննչական մարմինների եզրահանգումներին: Նրանց փոխանցմամբ՝ համալիրն աշխատում է շուրջ տասը տարի, իսկ էլեկտրալարերն այդ ամբողջ ընթացքում շահագործվել են նույն ռեժիմով: Առևտրականները նաև նշում են, որ առևտրի կենտրոնի դիմաց՝ նույն լարերի տակ գտնվող ավտոլվացման կետերն ու առևտրային մյուս օբյեկտները շարունակում են աշխատել առանց որևէ սահմանափակման:
Վարձակալները իրավապահների գործողությունները կապում են «Մուլտի Գրուպ» կոնցեռնի հիմնադիր Գագիկ Ծառուկյանի նկատմամբ իրականացվող քրեական հետապնդման հետ: Տնտեսվարողները նշում են, որ աշխատանքից զրկվել են առանց նախնական ծանուցման և անգամ անձնական իրերը վերցնելու հնարավորության: Եթե տաղավարները մոտ օրերս չբացվեն, առևտրականները մտադիր են դուրս գալ փողոցային բողոքի ակցիաների:
