Միջազգային իրավունքի ոլորտի առաջատար փորձագետ, Միջազգային քրեական դատարանի նախկին գլխավոր դատախազ, Հարվարդի և Յեյլի համալսարանների դասախոս Լուիս Մորենո Օկամպոն պատասխանել է Արցախի նախագահ Արայիկ Հարությունյանի նամակին։ Այս մասին «Արցախպրես»-ին տեղեկացրեց նախագահի մամուլի քարտուղար Լուսինե Ավանեսյանը։
Ուղերձում Հարությունյանը Օկամպոյին խնդրել է փորձագիտական գնահատական տալ, թե արդյոք Արցախի դեմ Ադրբեջանի գործողությունները համապատասխանում են «ցեղասպանություն» հասկացությանը։
Պատասխան նամակում Օկամպոն ասել է. «Ինձ համար պատիվ է վերլուծել խնդիրը և ձեզ ներկայացնել իմ կարծիքը։ Ես կպատրաստեմ համապարփակ զեկույց՝ վերլուծելով փաստերն ու օրենքները։ Իմ գնահատականը կլինի անաչառ և հիմնված կլինի pro bono (հանուն հանրային բարօրության) սկզբունքի վրա։
Ցեղասպանության իրականացման վերաբերյալ եզրակացություն անելու համար ես պետք է վերլուծեմ Ադրբեջանի ղեկավարության մտադրությունները և փաստերի հիման վրա եզրակացություն անեմ։ Իմ գնահատականի ճշտությունն ու անաչառությունը պաշտպանելու համար ես կգրեմ Ադրբեջանի նախագահին՝ հնարավորություն տալով ուղղակիորեն հստակեցնել իր դիրքորոշումը։
Հաշվի առնելով հարցի հրատապությունը, ներառյալ 120 հազար հայերի համար սովի վտանգը, ես նախատեսում եմ իմ զեկույցը հրապարակել 7 օրից։ Վերլուծության համար խնդրում ենք հայտնել ցանկացած նոր հանգամանք, որը կարող է ազդել իրավիճակի վրա»։
Օկամպոին ուղղված ուղերձում Արցախի նախագահը խնդրել է պատասխանել երեք հարցի.
ա) Կարելի՞ է համարել, որ 2022 թվականի դեկտեմբերի 12-ից ի վեր Ադրբեջանի կողմից մեր ժողովրդի շրջափակումը և հատկապես 2023 թվականի հունիսի 15-ից Լեռնային Ղարաբաղին ամեն տեսակի մարդասիրական օգնության մատակարարման արգելափակումը հանդիսանում է ցեղասպանության հանցագործություն։
բ) Արդյո՞ք Միջազգային քրեական դատարանը իրավասու է այդ հարցով զբաղվելու:
գ) Ո՞վ կարող է անձամբ պատասխանատու լինել այդ հանցագործության համար:
