Երևանում պաշտոնապես բացվել է հայ հայտնի քաղաքական և պետական գործիչ Կարեն Դեմիրճյանի արձանը։
Բրոնզաձույլ արձանը տեղադրվել է Դեմիրճյանի անունը կրող Մարզահամերգային համալիրի (ՄՀՀ) դիմաց։ Քանդակագործն է Սարգիս Բաբայանը, ճարտարապետը՝ Լևոն Առաքելյանը։
Երևանի մարզահամերգային համալիրի 40-ամյակի միջոցառումների շրջանակում տեղադրված արձանի բացման արարողությանը ներկա էին Հայաստանի և Երևանի իշխանությունների ներկայացուցիչներ, Դեմիրճյանների ընտանիքի անդամներ։ Նրանք ծաղիկներ են խոնարհել Կարեն Դեմիրճյանի արձանին՝ հարգանքի տուրք մատուցելով նրա հիշատակին:
Խորհրդային տարիներին Դեմիրճյանը 14 տարի (1974 - 1988 թ․թ․) եղել է ՀԽՍՀ Կենտկոմի առաջին քարտուղար։ 1999 թվականին ընտրվել է Հայաստանի Ազգային ժողովի նախագահ։ Սպանվել է 1999 թվականի հոկտեմբերի 27-ին խորհրդարանում տեղի ունեցած ահաբեկչության ժամանակ։ Հետմահու արժանացել է «Հայաստանի ազգային հերոս» կոչմանը։
