2023 թվականի նոյեմբերի 6-ին Լևոն Քոչարյանը ստանալու է պատգամավորի կարգավիճակ և գրեթե երկու ամիս ապօրինի կալանքը ենթակա է վերացման։ Այս մասին հայտարարություն է տարածել Լևոն Քոչարյանի փաստաբանական խումբը:
Ինչպես նշում են Քոչարյանի փաստաբաններ Ալեքսանդր Կոչուբաևը, Էրիկ Ալեքսանյանը և Արամ Վարդևանյանը՝ նոյեմբերի 3-ին պարզ դարձավ, որ «Հայաստան» դաշինքի ընտրական ցուցակի թվով երեք պատգամավորի թեկնածուներ՝ Միհրդատ Մադաթյանը, Անժելա Նալբանդյանը և Գերասիմ Վարդանյանը դիմել են ԿԸՀ՝ ներկայացնելով ինքնաբացարկի դիմումներ: Նշվածից ելնելով «Ընտրական օրենսգիրք» սահմանադրական օրենքի շրջականերում՝ ընտրական ցուցակի առաջին մասի հերթական հաջորդ թեկնածուն հանդիսանում է գրեթե երկու ամիս ակնհայտ ապօրինի կալանավորված, ոստիկանության ծառայողների կողմից խոշտանգման հանցակազմով նաև տուժողի դատավարական կարգավիճակ ունեցող Լևոն Քոչարյանը:
Կենտրոնական ընտրական հանձնաժողովի նիստը, որի շրջանակներում արձանագրվելու է Լևոն Քոչարյանի կողմից ՀՀ ԱԺ պատգամավորի մանդատ ստանալը, տեղի է ունենալու 2023 թվականի նոյեմբերի 6-ին:
Արդյունքում Լևոն Քոչարյանը նոյեմբերի 6-ից լինելու է ազատության մեջ:
Փաստաբանները հայտնում են նաև, որ պատգամավորի անձեռնմխելիության ուժով նույնիսկ ապօրինի կալանքի վերացումը չի հանգեցնում քրեական հետապնդման դադարեցմանը։
Հայաստանի նախկին նախագահ Ռոբերտ Քոչարյանի որդին՝ Լևոն Քոչարյանը, մեղադրվում է Երևանում տեղի ունեցած հանրահավաքում ոստիկանի նկատմամբ բռնություն գործադրելու մեջ։
Ընդդիմադիր «Հայաստան» խմբակցությունում պատգամավորի տեղը թափուր է մնացել այն բանից հետո, երբ պատգամավոր Արմեն Չարչյանը հոկտեմբերին որոշեց հրաժարվել մանդատից։
