Վաշինգտոնում օդի որակը շարունակում է վատանալ Կանադայում հրդեհների պատճառով, այն արդեն ամենավատն է վերջին տասնամյակում, հաղորդում է ՌԻԱ Նովոստիի թղթակիցը։
Հինգշաբթի առավոտյան ծուխը դեռ չէր վերացել, իսկ ԱՄՆ օդի որակի AQI ինդեքսն, ըստ AirNow.gov պորտալի, 240 միավոր էր: Կեսօրին մոտ այն հասել է 292 միավորի, որը բնութագրվում է որպես «առողջության համար շատ վնասակար» և համապատասխանում է սպառնալիքի նախավերջին՝ մանուշակագույն աստիճանին։
Տեղական լրատվամիջոցներն իրավիճակն «աննախադեպ» են անվանել՝ մանրամասնելով, որ օդի աղտոտվածության նման մակարդակ մայրաքաղաքում, հավանաբար, մոտ 20 տարի չի գրանցվել։ Թեև 2021թ․ կարճ ժամանակով հայտարարվել էր մանուշակագույն մակարդակ՝ խոսքն «օզոնային աղտոտվածության» մասին էր, այլ ոչ թե այրման հետևանքով առաջացած մթնոլորտում մանր մասնիկների ավելցուկի, ինչպես հիմա է:
Ըստ BreezoMeter պորտալի՝ օդում մանր մասնիկների քանակությունը (այսպես կոչված՝ PM2.5 ինդեքսն) այսօր առնվազն երեք անգամ գերազանցում է ԱՀԿ-ի սահմանած նորման։ Նմանատիպ իրավիճակ այժմ նկատվում է Փենսիլվանիայում՝ Հարիսբուրգ, Յորք և Լանկաստեր քաղաքների շրջակայքում։
Չնայած մայրաքաղաքը պատած դեղնամոխրագույն ծխին, Վաշինգտոնի երկու օդանավակայանները շարունակում են գործել, սակայն նախազգուշացնում են ուղևորներին տեղեկությունները ճշտել թռիչքների օպերատորներից: Այսօր բաց են նաև քաղաքային դպրոցները, սակայն բոլոր բացօթյա դասերն ու միջոցառումները չեղարկվել են։ Բացի այդ, չեն աշխատում Վաշինգտոնի բազմաթիվ բնակելի համալիրների բացօթյա լողավազանները։