Բեռների տեղափոխումն արգելափակելու քայլը եւս մեկ անգամ վկայում է ԼՂ-ում հումանիտար ճգնաժամի խորացմանը միտված Ադրբեջանի քաղաքականության մասին։ Այս մասին հայտարարել է Հայաստանի վարչապետ Նիկոլ Փաշինյանը Փարիզի քաղաքապետ Անն Իդալգոյի գլխավորած պատվիրակության անդամներին։
Օգոստոսի 30-ին Ֆրանսիայից Արցախի բնակչության համար նախատեսված մարդասիրական բեռներով ավտոշարասյունը Երևանից ուղևորվել է Հայաստանի Սյունիքի մարզի Կոռնիձոր՝ Արցախ մուտք գործելու համար։
Կառավարության մամուլի ծառայությունից հայտնում են, որ վարչապետը բարձր է գնահատել եւ շնորհակալություն հայտնել Ֆրանսիայի մի շարք շրջանների կողմից Լեռնային Ղարաբաղի ժողովրդին հումանիտար օգնություն ցուցաբերելու նախաձեռնությունը։
Զրուցակիցները շեշտել են ԼՂ-ում ստեղծված իրավիճակի հաղթահարմանն ուղղված քայլերի անհրաժեշտությունը:
Հունիսի 26-ին Հայաստանի կառավարությունը 361 տոննա մարդասիրական օգնություն է ուղարկել Լեռնային Ղարաբաղ։ Սակայն բեռնատարների շարասյունը մինչ օրս կանգնած է Լաչինի միջանցքի մուտքի մոտ՝ ՀՀ Սյունիքի մարզի Կոռնիձոր գյուղում։ Ադրբեջանը, փաստացի, արգելափակել է նրանց մուտքը Լեռնային Ղարաբաղ։ Օգոստոսի 9-ին Հայաստանի կողմից ուղարկված մարդասիրական օգնության բեռնատարների շարասյանն է միացել Ֆրանսիայից ուղարկված մարդասիրական օգնությամբ առաջին բեռնատարը։
