Ադրբեջանը, ապատեղեկատվություն տարածելով, հիմք է ստեղծում իր սադրանքների համար, ասաց ՀՀ պաշտպանության նախարար Սուրեն Պապիկյանը։
«Կատարվում է հետևյալը. Ադրբեջանը վերջին 1 շաբաթվա ընթացքում մշտապես տեղեկատվական կեղծ տեղեկատվություն տարածելով հենք է ստեղծում, որպեսզի կարողանա իր իսկ կողմից գործած սադրիչ գործողությունները ներկայացնել իբրև հայկական կողմի նախահարձակ գործողություններ: ՊՆ-ն մշտապես հանդես է գալիս պատշաճ հաղորդագրություններով ու այն, ինչ տեղի է ունենում սահմանին, ներկայացնում է մեր հանրութանը»,- ասաց նա չորեքշաբթի խորհրդարանում կառավարության հետ հարց ու պատասխանի ժամին։
ՊՆ ղեկավարը նշեց, որ այս ամենի պատճառն ադրբեջանական կողմի նպատակներն են` ի ցույց դնելու, որ հայկական կողմը որոշակի ագրեսիվ գործողությունների միտում ունի:
«Նման բան չկա, հայկական կողմը բանակցությունների սեղանի շուրջ շարունակելու է առաջ մղել խաղաղության օրակարգը, իհարկե, նաև պաշտպանելով մեր երկրի սուվերեն տարածքը», - ասաց Պապիկյանը:
