Պետքարտուղար Էնտոնի Բլինքենը հույս ունի շուտով Վաշինգտոնում ընդունել Հայաստանի և Ադրբեջանի արտգործնախարարներ Արարատ Միրզոյանին և Ջեյհուն Բայրամովին՝ խաղաղ բանակցությունների համար։ Այս մասին Բաքու կատարած այցից հետո իր X միկրոբլոգում գրել է Եվրոպայի և Եվրասիայի հարցերով ԱՄՆ-ի պետքարտուղարի օգնական Ջեյմս Օ՛Բրայենը։
Նոյեմբերի 16-ին Ադրբեջանի ԱԳՆ-ն հայտարարեց, որ Բաքուն հնարավոր չի համարում 2023 թվականի նոյեմբերի 20-ին Վաշինգտոնում Ադրբեջանի և Հայաստանի ԱԳ նախարարների մակարդակով հանդիպում անցկացնելը։ ԱԳՆ-ն նշել էր, որ իբր «ԱՄՆ-ի միակողմանի մոտեցումը կարող է հանգեցնել նրան, որ Միացյալ Նահանգները կորցնի միջնորդի իր դերը»։ Դրանից հետո Պետդեպարտամենտի խոսնակ Մեթյու Միլլերը հայտարարեց Ադրբեջանի և Հայաստանի միջև խնդիրները լուծելու համար խաղաղ բանակցությունների շարունակական աջակցության մասին և երկու կողմերին կոչ արեց «մասնակցել այդ բանակցություններին՝ անկախ նրանից՝ դրանք տեղի կունենան այստեղ, թե այլ վայրում»։
Ավելի վաղ Եվրոպայի և Եվրասիայի հարցերով ԱՄՆ պետքարտուղարի օգնական Ջեյմս Օ՛Բրայենը հայտարարել էր, որ ԱՄՆ-ը կասեցրել է ռազմական և այլ օգնությունը Ադրբեջանին և չեղարկել բարձր մակարդակի որոշ այցեր։ «Վաշինգտոնը Բաքվին ազդակ ուղարկեց, որ երկկողմ հարաբերությունների կարգավորում չի լինի, քանի դեռ Հայաստանի հետ խաղաղ բանակցություններում առաջընթաց չի գրանցվել», - ասել էր նա։
