Ֆրանսիայի նախագահ Էմանուել Մակրոնը Մարսելի հայ համայնքի հետ հանդիպման ժամանակ հայտարարել է Արցախի հարցում իր վճռականության մասին, հայտնում է ՀՅԴ գրասենյակը։
«Ես ավելի շատ ճնշում եմ գործադրել և կշարունակեմ գործադրել (Ադրբեջանի նախագահ Իլհամ-խմբ.) Ալիևի վրա, քան (ինքը՝ ՀՀ վարչապետ Նիկոլ - խմբ.) Փաշինյանը։ Ես միակն եմ, ով հստակ դիրքորոշում և ուղերձ ունեմ Արցախի հարցում։ Չկասկածեք իմ վճռականության մեջ՝ կապված Արցախի և ընդհանրապես Հայաստանի հետ»,- ասել է Ֆրանսիայի նախագահը։
Նա վստահեցրել է, որ շարունակելու է ջանքեր գործադրել այս ուղղությամբ, նույնիսկ եթե հանկարծ պարզվի, որ ինքը գրեթե միակ միջազգային խաղացողն է, որ առաջ է քաշում այս օրակարգը։
«Դուք նաև գիտեք, որ Ֆրանսիան իր ռազմական կցորդին առաջին անգամ ուղարկել է Հայաստանում իր դեսպանատուն, որը պետք է ինչ-որ բան նշանակի, չէ՞։ Մենք պետք է անենք հնարավորը, առավելագույնը»,- նշել է Մակրոնը։
