Ռուսաստանն իրականացնում է «Հյուսիս-Հարավ» նախագիծը, կան պայմանավորվածություններ գործընթացի բոլոր մասնակիցների հետ՝ Իրանի, Ադրբեջանի, հետաքրքրություն են ցուցաբերում Թուրքմենստանը և Ղազախստանը, ասել է ՌԴ նախագահ Վլադիմիր Պուտինը, տեղեկացնում է ՌԻԱ Նովոստին։
«Այսօր և ընդհանրապես հեշտ գործեր չեն լինում, բայց ամեն ինչ իրականանալի է։ Մենք պայմանավորվածություններ ունենք այս գործընթացի բոլոր մասնակիցների հետ՝ կան համապատասխան փաստաթղթեր Իրանի, Ադրբեջանի հետ, և շուտով կհանդիպեմ նախագահ Ալիևի հետ Ղրղզստանում ԱՊՀ գագաթնաժողովի շրջանակներում։ Այս թեմայով մենք անպայման կխոսենք։ Ադրբեջանն ունի բազմաթիվ ընթացիկ խնդիրներ, բայց ոչ ոք չի հրաժարվում այս նախագծից։ Հետաքրքրություն է ցուցաբերում նաև Թուրքմենստանը, մյուս կողմից՝ Ղազախստանը»,- ասել է Պուտինը ռուսական էներգետիկ շաբաթվա լիագումար նիստում ունեցած ելույթի ժամանակ։
Նա նաև նշել է, որ ավարտվում են «Հյուսիս-հարավ» նախագծի իրականացման նախապատրաստական աշխատանքները, այդ նպատակով ստեղծվում է կոնսորցիում ՎՏԲ բանկի գլխավորությամբ։
«Երբ դա գործնականում սկսվի, գիտեք, հիմա մենք կստեղծենք կոնսորցիում, որը ղեկավարում է, կարծեմ, Ռուսաստանի ՎՏԲ- Վնեշտորգբանկը, այս աշխատանքը, նախապատրաստումը, նախապատրաստական աշխատանքներն ավարտվում են: Հուսով եմ, որ ամեն ինչ կսկսվի շատ մոտ ապագայում»,- ասել է Պուտինը ռուսական էներգետիկ շաբաթվա լիագումար նիստում իր ելույթի ժամանակ։
Հյուսիս-Հարավ ՄՏԿ-ն Սանկտ Պետերբուրգից մինչև Մումբայ նավահանգիստ (Հնդկաստան) մուլտիմոդալ երթուղի է 7,2 հազար կիլոմետր երկարությամբ։ Գոյություն ունի ՄՏԿ երեք երթուղի՝ տրանսկասպյան (օգտագործելով երկաթուղիներ և նավահանգիստներ), ինչպես նաև արևմտյան և արևելյան (ցամաքային): 2023 թվականի մայիսին Ռուսաստանը և Իրանը փաստաթղթեր են ստորագրել Հյուսիս-Հարավ երթուղու արևմտյան՝ Իրանի Ռեշտ-Աստարա երկաթուղու վերջին անհրաժեշտ հատվածի կառուցումն ավարտելու մասին:
