Ֆրանսիա կատարած աշխատանքային այցի շրջանակում, ՀՀ պաշտպանության նախարար Սուրեն Պապիկյանն այցելել է Ֆրանսիայի Հանրապետության Սենատ, որտեղ հանդիպումներ է ունեցել Սենատի փոխնախագահ Պիեռ Ուզուլիասի, արտաքին հարաբերությունների, պաշտպանության և զինված ուժերի հանձնաժողովի նախագահ Սեդրիկ Պերանի և Սենատի Ֆրանսիա-Հայաստան բարեկամական խմբի նախագահ Ժիլբեր-Լյուկ Դըվինազի հետ, հայտնում են ՀՀ ՊՆ մամլո խառայությունից։
Քննարկվել են հայ-ֆրանսիական երկկողմ պաշտպանական համագործակցությանն առնչվող հարցեր:
Պաշտպանության նախարարը ներկայացրել է համագործակցության ներկայիս ընթացքը և այս այցի շրջանակներում ունեցած քննարկումների արդյունքները:
Նախարար Պապիկյանը շնորհակալություն է հայտնել համագործակցության զարգացման գործում ցուցաբերած աջակցության համար: Սենատորները պատրաստակամություն են հայտնել շարունակելու աջակցությունը հայ-ֆրանսիական համագործակցության զարգացմանը:
Հանդիպման ընթացքում քննարկվել են նաև տարածաշրջանային անվտանգությանն առնչվող հարցեր:
Ավելի վաղ Ֆրանսիա կատարած այցի ընթացքում Պապիկյանը և նրա ֆրանսիացի գործընկեր Սեբաստիեն Լըկորնյուն ստորագրել են Հայաստանին Thales-ի արտադրության երեք GM 200 ռադարի վաճառքի պայմանագիր և ֆրանսիական «Mistral»փոքր հեռահարության օդային պաշտպանության համակարգերի գնման մտադրության նամակ։ Ֆրանսիան կաջակցի նաև Հայաստանին իր ցամաքային պաշտպանական ուժերի վերապատրաստման հարցում և զինված ուժերի բարեփոխմանն ու արդիականացմանն ուղղված ջանքերում:
