«Բարգավաճ Հայաստան» կուսակցության առաջնորդ Գագիկ Ծառուկյանը Վարդենիսում անցկացվող քարոզարշավի ժամանակ կոշտ քննադատությամբ է հանդես եկել գործող իշխանությունների հասցեին՝ մեղադրելով նրանց խաղաղություն բերելու մասին անհիմն հայտարարությունների համար։ 2026 թվականի մայիսի 27-ին Ծառուկյանը պահանջել է, որ կառավարությունը ներկայացնի Ադրբեջանի նախագահ Իլհամ Ալիևի հետ ստորագրված և կնքված փաստաթուղթ, որը կհաստատի խաղաղության հաստատումը։
«Ասում են՝ խաղաղություն ենք բերել, բայց առանց ծրագրի են ման գալիս։ Թող Ալիևի հետ ստորագրած թուղթը ցույց տան։ Սուտը սրանց փեշակն է դարձել։ Ասում են՝ խաղաղություն ենք բերել, բայց ոչ մի ծրագիր չունեն։ Մենք ունենք լավ թիմ, լավ ծրագիր, ունենք ցանկություն մեր ժողովրդին այս վիճակից հանելու», — հայտարարել է Ծառուկյանը՝ ընդգծելով իր թիմի պատրաստակամությունը։
Քաղաքական գործիչը կասկածի տակ է դրել սահմանների քարտեզագրման և դելիմիտացիայի վերաբերյալ իշխանությունների նախաձեռնությունները։ «Մի հատ նշան են սարքել՝ քարտեզ, ի՞նչ, էդ նո՞ր եք հայտնաբերել Հայաստանը՝ մասնատելով, բաժանելով։ Եթե ասում եք խաղաղություն ենք բերել, թող ցույց տան իր և Ալիևի ստորագրած, պեչատած թուղթը, ու ասեն, որ այսօրվանից խաղաղություն է, ոչ մեկ իրավունք չունի ոչ սահման խախտելու, ոչ կրակելու։ Ես էլ կասեմ՝ ապրեք, ճիշտ եք ասում», — հավելել է նա։
Ծառուկյանը զգուշացրել է բանավոր պայմանավորվածությունների վտանգի մասին՝ շեշտելով Ադրբեջանի աճող ախորժակը։ «Սա բանավոր պայմանավորված է, Ադրբեջանի ախորժակը շատ մեծ է, այսօր ասում է՝ Սևանը Ադրբեջանինն է, Երևանն էլ՝ Էրիվան։ Մենք պետք է կարողանանք միասնական լինենք, ճիշտ ընտրություն կատարենք, որ նույն Ղարաբաղի ճակատագրին չարժանանանք», — եզրափակել է Ծառուկյանը՝ կոչ անելով ժողովրդին լինել միասնական և կատարել ճիշտ ընտրություն։
