Օգոստոսի 1-ից Երևանում կգործի արտաքին լուսավորության նոր գրաֆիկ, չորեքշաբթի ասել է «Երքաղլույս» ՓԲԸ տնօրեն Անդրանիկ Թևոսյանը։
«Ամռանը և աշնանը լուսավորությունը կգործի մինչև ժամը 02:00-ն, իսկ ձմռանը և գարնանը` մինչև ժամը 01:00-ն (մեկ ժամ ավելի երկար՝ խմբ.): Մայրաքաղաքի բոլոր վարչական շրջաններում նախապատրաստական աշխատանքներն ակտիվ փուլում են։ Նատրիումի հին լամպերը փոխարինվում են նոր LED լամպերով։ Ավելի քան 5500-ն արդեն փոխարինվել է»,- ասուլիսում ասաց Թևոսյանը։
Նրա խոսքով, Երևանում արդեն կան փողոցներ, որտեղ նոր լամպերի շնորհիվ հնարավոր կլինի խնայել էլեկտրաէներգիայի մինչև 70 տոկոսը։
LED լուսատուների տեղադրումը ուղեկցվում է նաև առկա հենարանների թարմացման աշխատանքներով: Սա իր հերթին, ինչպես նշել է ընկերության տնօրենը, հանգեցնում է էլեկտրաէներգիայի անջատումների, ինչպես նաև համակարգի խափանումների նվազմանը։
