Սիցիլիա կղզում Էտնա հրաբուխը կրկին ժայթքել է։ Այս մասին հայտնում է La Sicilia թերթը՝ հղում անելով Իտալիայի երկրաֆիզիկայի և հրաբխագիտության ազգային ինստիտուտին (INGV):
Պարբերականի տվյալներով՝ ժայթքումը տեղի է ունեցել հրաբխի հարավարևելյան խառնարանում։ Ըստ INGV-ի փորձագետների՝ ժայթքման սյունի բարձրությունը ծովի մակարդակից մոտ 4,5 հազար մ է եղել, նշում է ՏԱՍՍ-ը։
Նշվում է, որ Էտնայի այս ժայթքումը չի ազդում սիցիլիական Կատանիա քաղաքի օդանավակայանի շահագործման վրա։
Էտնան գտնվում է մասնագետների մշտական հսկողության ներքո։ Որպես կանոն, այս հրաբխի ակտիվությունը բնակչության համար վտանգ չի ներկայացնում։