Հայաստանի երրորդ նախագահ Սերժ Սարգսյանը հինգշաբթի օրը դատարանում ցուցմունք տվեց իրեն առաջադրված մեղադրանքի վերաբերյալ։
«Ես առանձնապես ասելիք չունեմ, որովհետև դատաքննության ողջ ընթացքը հստակ ապացուցեց, որ Սերգո Կարապետյանը ճիշտ որոշում է կայացրել, և եթե նա այդպիսի որոշում չկայացներ, պատասխանատվություն կկրեր այն ժամանակ»,- ասաց Սարգսյանը՝ չբացահայտելով մանրամասներ։
Քրեական գործի շրջանակներում ՀՀ գյուղատնտեսության նախկին նախարար, հանգուցյալ Սերգո Կարապետյանին մեղադրանք էր առաջադրվել առանձնապես խոշոր չափերով (մոտ 489,2 մլն դրամ, այսինքն՝ ավելի քան 1 մլն դոլար) գույքի յուրացում կամ հափշտակություն կատարելու համար, իսկ նախկին նախագահ Սերժ Սարգսյանը, «Ֆլեշ» ՍՊԸ-ի սեփականատեր Բարսեղ Բեգլարյանը, գյուղատնտեսության նախկին փոխնախարար Սամվել Գալստյանը և գյուղնախարարությունում բուսաբուծության վարչության պետ Գևորգ Հարությունյանը մեղադրվում են այս հանցագործությանը մեղսակցության համար։
