ՀՀ երրորդ նախագահ Սերժ Սարգսյանն Արցախի խնդիրն ու Հայաստանի պետականաշինությունը համարում է իր կյանքի առաքելությունը։
«Եղել և հաստատապես շարունակում եմ լինել Արցախի իմ քույրերի ու եղբայրների կողքին՝ հավատարիմ իմ մարտական ընկերների շիրիմների առջև տված երդմանս՝ կիսատ չթողնել համատեղ սկսած գործը»,- ասված է Սարգսյանի հայտարարության մեջ, որը հրապարակվել է ՀՀ վարչապետի երեկվա հայտարարությունների կապակցությամբ։
Նախօրեին Նիկոլ Փաշինյանը հայտարարեց Ղարաբաղը Ադրբեջանի կազմում ճանաչելու պատրաստակամության մասին՝ ղարաբաղցիների իրավունքներն ու անվտանգությունը երաշխավորելու պայմանով։
«ՀՀ վարչապետի աթոռը զբաղեցնող կապիտուլյանտի՝ Արցախը Ադրբեջանի մաս ճանաչելու այսօրվա՝ արդեն ուղիղ և անսքող հայտարարությունից հետո ինձնից արձագանք պահանջելը պարզապես անհասկանալի է, եթե չասեմ՝ վիրավորական»,- ասել է Սարգսյանը։
Նա հիշեցրել է, որ մշտապես, այդ թվում՝ անցած հինգ տարիներին, բոլոր հնարավոր առիթներով հայտարարել է, որ Արցախը չի´ լինելու Ադրբեջանի կազմում: «Ես և իմ գլխավորած քաղաքական ուժը՝ Հայաստանի հանրապետական կուսակցությունը, մեր բոլոր հայտարարություններում, ելույթներում, ուղերձներում անընդհատ շեշտել ու հայտարարել ենք մեր սկզբունքային մոտեցումները Արցախի հարցում, կետ առ կետ շարադրել մեր դիրքորոշումները մեզ համար կենսական այդ հարցի, ինչպես նաև Հայաստանի կառավարիչների կործանարար քայլերի մասին․․․Բարձրաձայնել ենք, պայքարել ու շարունակում ենք պայքարել, որքան էլ մեզ զրպարտել են, վարկաբեկել, թիրախավորել՝ ականջալուր չլինելով մեր ահազանգերին ու նախազգուշացումներին»,- ասվում է հայտարարությունում։
Նախկին նախագահի կարծիքով, խոսքերից զատ, այսօր, առավել քան երբևէ, կարևոր են քայլերը, գործերը և համախմբվածությունը՝ անկախ ամենատարբեր տարաձայնություններից ու ամբիցիաներից, որոնք ոչինչ են մեր ժողովրդի գլխին կախված արհավիրքի կողքին։
«Արցախի խնդիրը, ինչպես և Հայաստանի պետականաշինության գործը ես համարել և համարում եմ իմ կյանքի առաքելությունը»:
