Հայաստանի պաշտպանական ծախսերը 2024 թվականին, 2018 թվականի համեմատ, նախատեսվում է ավելացնել 125%-ով կամ 309 մլրդ դրամով, երկուշաբթի ասել է Հանրապետության վարչապետ Նիկոլ Փաշինյանը։
«Միևնույն ժամանակ, պաշտպանական ծախսերի աճի դինամիկան ոչ մի կերպ չի հակասում Հայաստանի կառավարության կողմից նախկինում հայտարարված խաղաղության օրակարգին»,- ասել է Փաշինյանը 2024 թվականի պետական բյուջեի նախագծի խորհրդարանական լսումների ժամանակ։
Նրա խոսքով, պաշտպանության ծախսերը հանրապետության համար զգալի են և առանցքային։
«Մեզ համար առաջնային նշանակություն ունի մեր բանակի և մեր զինված ուժերի բարեփոխումը»,- ընդգծել է կառավարության ղեկավարը։
Նա նշել է, որ մարտունակ զինված ուժերի առկայությունը ցանկացած պետության օրինական իրավունքն է և պարտադիր հատկանիշը։
«Եվ մենք այս ուղղությամբ առաջ ենք գնում։ Իհարկե, ոչ այն տեմպերով, ինչ կցանկանայինք, բայց դրա համար կան բավականին օբյեկտիվ և սուբյեկտիվ պատճառներ։ Այնուամենայնիվ, պետք է փաստեմ՝ Հայաստանի իշխանություններն արդեն իրականացնում են այն կուրսը, որը նախապես հայտարարել էին։ Մասնավորապես՝ դիվերսիֆիկացնել մեր հարաբերությունները անվտանգության ոլորտում»,- ասել է վարչապետը։
ՀՀ ֆինանսների նախարար Վահե Հովհաննիսյանն իր հերթին ասել է, որ 2024 թվականին պաշտպանության ոլորտում կապիտալ ծախսերը պետք է կազմեն մոտ 555 մլրդ դրամ։
«Սա 7%-ով ավելի է, քան 2023թ. Փաստորեն, խոսքը երկրի ՀՆԱ-ի 5,3%-ի մասին է»,- ասել է Հովհաննիսյանը 2024 թվականի պետական բյուջեի նախագծի խորհրդարանական լսումների ժամանակ ($1 – 402,55 դրամ)։
