2024 թվականին Հայաստանը մոտ 20 միլիարդ դրամ (մոտ 50 միլիոն դոլար) կհատկացնի Հայկական ատոմակայանի շահագործման ժամկետը մինչև 2036 թվականը երկարաձգելու համար, ասաց ՀՀ տարածքային կառավարման և ենթակառուցվածքների նախարար Գնել Սանոսյանը։
Նրա խոսքով՝ Մեծամորի ԱԷԿ-ը բավական լավ վիճակում է, հաշվի առնելով, որ հսկայական աշխատանք է իրականացվել և շարունակվում է իրականացվել։
«ՀԱԷԿ-ի լիցենզիան ուժի մեջ է մինչև 2026 թվականը, որոշ աշխատանքների գծով՝ մինչև 2031 թվականը: Ներկայումս որոշ աշխատանքների համար միջոցներ են հատկացվել, մասնավորապես հաջորդ տարվա համար նախատեսվում է հատկացնել 7 միլիարդ դրամ (մոտ 17,1 միլիոն դոլար)»,- ասել է Սանոսյանը Հանրային հեռուստաընկերությանը տված հարցազրույցում:
Այնուհետև, ըստ նրա, կսկսվի ատոմակայանի շահագործման կրկնակի ժամկետի երկարացման մեծ ծրագիր, որը հիմա փաստաթղթային փուլում է։ «Մենք պատրաստվում ենք հայտ ներկայացնել և ստանալ կայանի շահագործումը մինչև 2036 թվականը երկարաձգելու լիցենզիա։ Դա մեր հիմնական խնդիրն է, միևնույն ժամանակ մեր հեռահար նպատակը նոր էներգաբլոկի կառուցումն է, որի հզորության և այլ պարամետրերի որոշումը բավական բարդ են և այդ ուղղությամբ աշխատանքներ են տարվում»,- ընդգծել է նախարարը։
Ինչ վերաբերում է գործընկեր երկրի ընտրությանը (որին կպատվիրվի նոր ատոմակայանի կառուցման նախագիծը), ինչպես նշեց նախարարը, դա կախված կլինի ընտրված հզորությունից։
Հայկական ԱԷԿ-ի մասին
Հայկական ատոմակայանը, միակը Հարավային Կովկասի տարածաշրջանում, գտնվում է Մեծամոր քաղաքի մոտ՝ Երևանից մոտավորապես 30 կմ դեպի արևմուտք։ Կայանը երկրի էլեկտրաէներգիայի հիմնական աղբյուրներից մեկն է, որն ապահովում է ընդհանուր արտադրանքի մինչև 40%-ը։ Նրա ծառայության ժամկետը երկարաձգվել է մինչև 2026 թվականը, աշխատանքներ են տարվում ևս 10 տարով այն կրկին երկարաձգելու ուղղությամբ։ Աշխատանքները նախատեսվում է սկսել 2023 թվականի աշնանը և ավարտել երկու տարվա ընթացքում։
Նախատեսվում է 8-10 տարվա ընթացքում կառուցել նոր ատոմակայան, այժմ համեմատվում են տարբեր տարբերակներ, ուսումնասիրվում է Ռուսաստանի, ԱՄՆ-ի, Հարավային Կորեայի գործընկերների փորձը։ «Ռոսատոմ» պետական կորպորացիայի կողմից մշակված 1200 ՄՎտ հզորությամբ նոր էներգաբլոկի կառուցման նախնական տեխնիկատնտեսական հիմնավորումն արդեն իսկ հայկական կողմի քննարկման փուլում է։
Հայաստանի իշխանությունները չեն գիտակցում իրենց աղետալի քայլերի հետևանքները․ ադրբեջանագետ
