Ամառային շոգերի սկսվելուն պես ճիշտ խմելու հարցն առանձնահատուկ արդիական է դառնում։ Շատերը սովոր են ծարավը հագեցնել սովորական ջրով, սակայն կան նաև այլ ըմպելիքներ, որոնք ոչ միայն թարմացնում են, այլև լրացուցիչ օգուտ են բերում օրգանիզմին՝ օգնելով պահպանել ջրի և էլեկտրոլիտների հավասարակշռությունը։
Որքա՞ն խմել և ո՞վ պետք է զգույշ լինի:
Բժիշկները խորհուրդ են տալիս ամեն կես ժամը մեկ մի քանի կում հեղուկ խմել, նույնիսկ եթե ուժեղ ծարավ չեք զգում։ Սա օգնում է կանխել ջրազրկումը և գերտաքացումը։ Առողջ մարդու համար ընդհանուր նորման օրական 30-35 մլ հեղուկ է մարմնի քաշի մեկ կիլոգրամի համար։
Սակայն կան կարևոր բացառություններ։ Սրտի իշեմիկ հիվանդությամբ տառապող մարդիկ պետք է չափազանց զգույշ լինեն։ Հեղուկի ավելցուկը կարող է հանգեցնել արյան ճնշման զգալի բարձրացման։ Սրտաբանները խորհուրդ են տալիս օրական չգերազանցել 800 մլ հեղուկը և անպայման խորհրդակցել բժշկի հետ։ Նրանց համար հովանալու համար խորհուրդ են տրվում արտաքին մեթոդներ՝ բերանը սառը ջրով ողողելը, զով ցնցուղ ընդունելը և կոմպրեսներ դնելը զարկերակային կետերին։
Ըմպելիքներ, որոնք կփրկեն շոգից:
1. Տաք թեյ. Սա կարող է պարադոքսալ թվալ, բայց տաք ըմպելիքներն ավելի լավ են նպաստում մարմնի հովացմանը։ Անքաղցր կանաչ թեյը անանուխով կամ կիտրոնով հիանալի կերպով հագեցնում է ծարավը և նույնիսկ մի փոքր իջեցնում մարմնի ջերմաստիճանը։
2. Հատապտղային մորս և տնական լիմոնադ. Գլխավոր կանոնը՝ նվազագույն շաքար և չափավոր ջերմաստիճան։ Թարմ հատապտուղներից պատրաստված մորսերը, ինչպես նաև ջրից և ցիտրուսային հյութից պատրաստված լիմոնադը (կարելի է ավելացնել կոճապղպեղ, անանուխ կամ հատապտուղներ) հիանալի կերպով թարմացնում են՝ առանց ավելորդ կալորիաների։
3. Սեղանի հանքային ջուր. Խելամիտ քանակությամբ (օրական 0,5-0,75 լիտր) այն ոչ միայն ավելի արդյունավետ է հագեցնում ծարավը, քան սովորական ջուրը, այլև օգնում է պահպանել աղի հավասարակշռությունը, ինչը հատկապես կարևոր է ուժեղ քրտնարտադրության դեպքում։ Ընտրեք նվազագույն աղի պարունակությամբ ջուր և խուսափեք դատարկ ստամոքսին խմելուց։
4. Լոլիկի հյութ. Այս ըմպելիքը ծարավը հագեցնելու իսկական չեմպիոն է։ Այն շատ ավելի քիչ շաքար է պարունակում, քան մրգային հյութերը, և նպաստում է արյան նոսրացմանը, ինչը չափազանց արդիական է ուժեղ շոգին։ Կարելի է խմել օրական մինչև մեկ լիտր՝ ավելացնելով մի փոքր աղ՝ համի համար։
5. Թան. Ավանդական թթվակաթնային ըմպելիքը ոչ միայն հիանալի թարմացնում է, այլև նպաստում է թքարտադրության նվազեցմանը, ինչպես նաև պահպանում է օրգանիզմի առողջ թթվահիմնային հավասարակշռությունը։ Սա իդեալական ընտրություն է նրանց համար, ովքեր փնտրում են ավելի սննդարար բան, քան պարզապես ջուրը։
Ընտրելով այս ըմպելիքները՝ դուք ոչ միայն արդյունավետորեն կհաղթահարեք ծարավը, այլև կպահպանեք ձեր առողջությունը շոգ օրերին։ Հիշեք բժիշկների խորհուրդները և վայելեք ամառը անվտանգ։
