Որոշ երկրներ փորձում են Անկախ Պետությունների Համագործակցության (ԱՊՀ) երկրներում սասանել լեգիտիմ իշխանությունը, ավանդական արժեքները և իրադրությունն առհասարակ։ Այս մասին ասել է ՌԴ նախագահ Վլադիմիր Պուտինը ԱՊՀ անվտանգության խորհուրդների քարտուղարների հանդիպման մասնակիցներին ուղղված տեսաուղերձում։ «Գլոբալ անկայունությունը արտածվում է նաև Եվրասիայի վրա։ Ավելին, որոշ երկրների գործողություններն ուղղղված են ԱՊՀ երկրներում լեգիտիմ իշխանության, հանրային կայունության և ավանդական արժեքների, մեր ավանդական սերտ առևտրային, կոոպերացիոն, մշակութային կապերի սասանմանը»,- ասել է նա։
Պուտինն ուշադրություն է հրավիրել այն հանգամանքին, որ պահպանվում են ԱՊՀ երկրների համար ընդհանուր այնպիսի սպառնալիքները, ինչպիսին են ահաբեկչությունը և կազմակերպված հանցավորությունը, թմրանյութերի առևտուրը և անօրինական միգրացիան, արմատականությունը և ծայրահեղականությունը, ինչպես նաև ռիսկերը տնտեսական, տեղեկատվական, տեխնոլոգիական և կենսաբանական անվտանգության ոլորտում։
«Այս ամենը պահանջում է ոչ միայն համաձայնեցված հավաքական արձագանք, այլև ավելի մեծ կանխիչ աշխատանք։ Այդ թվում կարևոր է առավելագույնս օգտագործել անվտանգության խորհուրդների կանխատեսման, տեղեկատվա-վերլուծաբանական պոտենցիալը ԱՊՀ տարածքում և ընդհանրապես աշխարհում իրավիճակի խոր ու համակողմանի ուսումնասիրման, գերակայությունների հստակ սահմանման, ռազմավարական պլանավորման փաստաթղթերի ճշգրտումը ժամանակին կատարելու համար»,- նշել է նա։
ՌԴ նախագահը վստահ է, որ Անվտանգության խորհուրդների միջոցով համագործակցությունը կշարունակի ծառայել ԱՊՀ երկրների կայունության և անվտանգության ամրապնդմանը և ընդհանուր նպատակներին հասնելու համակարգված մոտեցումների մշակմանը։
