Հայաստանի շրջակա միջավայրի նախարարությունը հայտարարություն է տարածել Երասխ համայնքում (Արարատի մարզ, Ադրբեջանին սահմանակից) մետալուրգիական գործարանի կառուցման վերաբերյալ։
«Հայաստանի Հանրապետության տարածքում մետալուրգիական գործարանը կառուցվելու է բոլոր բնապահպանական նորմերին ու պահանջներին համապատասխան՝ ներպետական օրենսդրական կարգավորումների շրջանակներում։
Գործարանի շահագործման արդյունքում շրջակա միջավայրի վրա բացասական անդրսահմանային ազդեցությանը վերաբերող Ադրբեջանի հայտարարությունն անհիմն է և որևէ կերպ չի համապատասխանում իրականությանը», - ասված է նախարարության ֆեյսբուքյան հայտարաության մեջ։
Նշվում է, որ այս բնապահպանական կեղծ ահազանգերի միակ իրական նպատակը Հայաստանի Հանրապետության տնտեսական զարգացումը խոչընդոտելն է:
«Հայաստանի Հանրապետությունը հավատարիմ է շրջակա միջավայրի պահպանության ոլորտում ստանձնած միջազգային բոլոր պարտավորությունների կատարմանը»,- շեշտել են նախարարությունում։
Ավելի վաղ Հայաստանի էկոնոմիկայի նախարար Վահան Քերոբյանը հայտարարել էր Երասխում 70 մլն դոլար ներդրմամբ հայ-ամերիկյան խոշոր մետալուրգիական գործարանի կառուցման մասին։ Ենթադրվում է, որ ձեռնարկությունում կաշխատի մոտ 1000 մարդ, արտադրության տարեկան ծավալը նախատեսված է շուրջ 180 հազար տոննա։
