Հայաստանի Հանրապետական կուսակցությունը հայտարարություն է տարածել կուսակցության փոխնախագահ, կրթության և գիտության նախկին նախարար Արմեն Աշոտյանի կալանավորման վերաբերյալ։
Աշոտյանը հինգշաբթի օրը 24 ժամով կալանավորվել է։
«Տարիներ առաջ հարուցված շինծու քրեական գործն ի սկզբանե Արմեն Աշոտյանին մեկուսացնելու նպատակ է հետապնդել, բայց գործի քաղաքական բնույթն այնքան ակնհայտ էր, որ անգամ Հայաստանի գործող կառավարիչների ուղղակի ղեկավարման տակ գտնվող քննչական մարմինները չէին կարողանում նրան մեկուսացնելու որոշում կայացնել:
Հատկանշական է, որ Արմեն Աշոտյանին ձերբակալելու և կալանավորելու պահանջով դատարան դիմելու որոշումը կայացվել է այս օրերին, երբ Հայաստանի շուրջ արտաքին քաղաքական օղակն օրեցօր ավելի է սեղմվում, ներքաղաքական կյանքում լարվածությունն ավելանում է, իսկ Հայաստանի կառավարիչների հեղինակությունը` տարբեր սոցհարցումների տվյալներով ավելի ու ավելի է գահավիժում»,- ասվում է հայտարարության մեջ։
ՀՀԿ-ն կոչ է արել ՀՀ իրավապահ համակարգին և դատական իշխանության ներկայացուցիչներին հրաժարվել կատարել քաղաքական իշխանությունների կողմից տրվող ապօրինի հրահանգները, իսկ ժողովրդավարության և մարդու իրավունքների հարցերով զբաղվող կառույցներին ուշադրություն դարձնել տեղի ունեցող բացահայտ հակաժողովրդավարական և հակաիրավական գործընթացի վրա։
ՀՀ քննչական կոմիտեի մամուլի քարտուղար Գոռ Աբրահամյանը լրատվամիջոցներին հաստատել է, որ Աշոտյանին կալանավորելու միջնորդությունն արդեն իսկ ներկայացվել է դատարան։
Ավելի վաղ Աբրահամյանը «Նովոստի–Արմենիա» գործակալությանը հայտնել էր, որ Աշոտյանը կալանավորվել է Երևանի Մխիթար Հերացու անվան պետական բժշկական համալսարանում ակնհայտ չարաշահումների փաստով քրեական գործի շրջանակներում։ Նախաքննությունը վարում է ՀՀ ՔԿ հատկապես կարևոր գործերի քննության գլխավոր վարչությունը։
Աշոտյանը 2005-2006թթ․ աշխատել է ԵՊԲՀ ռեկտորի խորհրդական հասարակական հիմունքներով, 2009-2016թթ. զբաղեցրել է Հայաստանի կրթության և գիտության նախարարի պաշտոնը։
