Ալբանիայում ընթացող Մ17 տարեկանների Եվրոպայի առաջնությունում ազատ ոճի ըմբշամարտի Հայաստանի երիտասարդական հավաքականը դարձավ թիմային մրցաշարի հաղթող։ Նման արդյունք Հայաստանի պատմության մեջ առաջին անգամ է գրանցվում (հունահռոմեական և ազատ ոճի ըմբիշների մեջ), հայտնում է Հայաստանի ըմբշամարտի ֆեդերացիան։
Հայ 10 մարզիկներից ութը նվաճել են մեդալներ։
Մինչև 71 կգ քաշային կարգում առաջնության հաղթող դարձավ Նարեկ Նիկողոսյանը, ով վերջին վայրկյաններին պարտության մատնեց ռուսաստանցի Իսլամ Կաժարովին։ Նարեկ Նիկողոսյանի փայլուն հաղթանակի տեսանյութը հասանելի է Wrestling-Armenia հեռագրային ալիքում։
Արծաթե մեդալներ են ստացել Արման Հարությունյանը (48 կգ), Սաշա Պետրոսյանը (51 կգ), Սամվել Գևորգյանը (55 կգ), Ռազմիկ Եփրեմյանը (80 կգ) և Հենրիկ Հայկյանը (110 կգ): Իսկ բրոնզե մեդալակիրներն են Տիգրան Բունիաթյանը (60 կգ) և Վլադիմիր Ազարյանը (65 կգ):
