Մարմնամարզության Եվրոպայի ֆեդերացիան և Հայաստանի մարմնամարզության ֆեդերացիան պայմանագիր են ստորագրել 2027 թվականին սպորտային մարմնամարզության Եվրոպայի առաջնությունը Երևանում անցկացնելու մասին։ Այս մասին երկուշաբթի ասել է վարչապետի աշխատակազմի ղեկավար Արայիկ Հարությունյանը՝ 2024-2030 թվականներին ֆիզիկական կուլտուրայի և սպորտի զարգացման ռազմավարության նախագծի քննարկմանը, հայտնում են կառավարության մամուլի ծառայությունից։
«Արդեն կա պայմանավորվածություն, և հաջորդ տարի մենք Փարիզում հայտ կներկայացնենք Ֆրանկոֆոնիայի միջազգային մարզական և մշակութային խաղերի ընդլայնման համար, որտեղ և կկայացվի վերջնական որոշումը»,- ասաց նա։
Ինչպես հայտնում է Հայաստանի մարմնամարզության ֆեդերացիայի մամուլի ծառայությունը, փաստաթուղթը ստորագրվել է նախօրեին Բուլղարիայի մայրաքաղաք Սոֆիայում։ Պայմանագիրն ուժի մեջ է մտնում ստորագրման պահից՝ դրանով իսկ տալով Երևանում կայանալիք Եվրոպայի առաջնության նախապատրաստական փուլի պաշտոնական մեկնարկը։
