Արգենտինացի ֆուտբոլիստ Լիոնել Մեսսին տեղափոխվել է ամերիկյան «Ինտեր Մայամի» ակումբ։ Այս մասին նա ասել է Mundo Deportivo-ին տված հարցազրույցում։ Նա չի հայտնել պայմանագրի մանրամասները։ Նրա նոր թիմը հանդես է գալիս հյուսիսամերիկյան MLS լիգայում, գրում է РБК-ն։
Ամերիկյան ակումբը պատկանում է մի խումբ ներդրողների՝ Անգլիայի նախկին ֆուտբոլիստ Դեյվիդ Բեքհեմի գլխավորությամբ:
«Ինտեր Մայամին» այս մրցաշրջանում վատ է հանդես գալիս MLS-ում՝ զբաղեցնելով վերջին տեղը Արևելյան կոնֆերենցիայում։ 16 խաղում թիմն ունի ընդամենը հինգ հաղթանակ և 15 միավոր։
ՊՍԺ-ը հայտարարեց Մեսսիի հեռանալու մասին հունիսի 3-ին՝ պայմանագրի ավարտին: Մեսսին ՊՍԺ էր տեղափոխվել 2021 թվականի ամռանը «Բարսելոնայի» հետ պայմանագրի ավարտից հետո ազատ գործակալի կարգավիճակով։ Ընդհանուր առմամբ, նա թիմի կազմում անցկացրել է 74 հանդիպում, խփել 32 գոլ և օգնել փարիզցիներին երկու անգամ հաղթել Ֆրանսիայի առաջնությունում։
Իսպանական Sport պարբերականը հայտնել էր, որ սաուդյան Ալ-Հիլալ ակումբը մտադիր է հունիսի 6-ին հայտարարել արգենտինացի հարձակվողի տրանսֆերի մասին։ Բայց ի վերջո դա տեղի չունեցավ։ Պարբերականը նաև նշել է, որ «Ինտեր Մայամին» Մեսսիին առաջարկել է ընդհանուր 200 միլիոն եվրո արժողությամբ չորս տարվա պայմանագիր։
Մայիսի սկզբին AFP գործակալությունը հայտնել էր, որ Մեսսիի տեղափոխությունը Սաուդյան Արաբիայի թիմերից մեկը համարվում է «լուծված հարց»։ Foot Mercato պորտալը մայիսի 30-ին գրել էր, որ Ալ-Հիլալը Մեսսիին առաջարկել է երկու տարվա պայմանագիր, որի շնորհիվ նա կարող է վաստակել 1,2 միլիարդ եվրո և դառնալ ամենաբարձր վարձատրվող մարզիկը։
35-ամյա Մեսսին տարվա լավագույն խաղացողին շնորհվող «Ոսկե գնդակ» մրցանակի յոթակի դափնեկիր է: Սա ռեկորդային ցուցանիշ է։ Մեսսին Արգենտինայի հետ հաղթել է 2022 թվականի աշխարհի առաջնությունը, 2021 թվականի Կոպա Ամերիկան և 2008 թվականի Օլիմպիական խաղերը։