ԵՄ դիվանագիտության ղեկավար Ժոզեպ Բորելը Եվրահանձնաժողովի հետ ծրագրում է չորեքշաբթի՝ նոյեմբերի 15-ին, առաջարկներ ներկայացնել Ռուսաստանի դեմ պատժամիջոցների 12-րդ փաթեթի վերաբերյալ, հայտնում է DW-ն Բրյուսելից։
«Մենք ավարտում ենք պատժամիջոցների 12-րդ փաթեթի վրա աշխատանքները։ Այդ միջոցառումների մի մասը անձնական պատժամիջոցներ են, մյուսը՝ տնտեսական ու ոլորտային սահմանափակումներ։ <...> Չորեքշաբթի օրը հանձնաժողովի հետ միասին իմ առաջարկները կներկայացնեմ Խորհուրդին»,- միության արտաքին գործերի նախարարների մակարդակով հանդիպումից հետո կայացած մամուլի ասուլիսում ասել է Բորելը։
Բացի այդ, նա պարզաբանել է, որ առաջարկվող պատժամիջոցները ներառում են «պատժամիջոցների ցանկում լրացուցիչ անձանց ավելացում, Ռուսաստանից արտահանման նոր սահմանափակումներ, այդ թվում՝ ադամանդի գնման արգելք, ռուսական նավթի գնի առաստաղի խստացման <...> , ինչպես նաև պատժամիջոցները շրջանցելու դեմ միջոցառումներ»։
Ավելի վաղ Bloomberg-ը, հղում անելով սեփական աղբյուրներին, հայտնել էր, որ Եվրամիությունը քննարկում է Ռուսաստանի Դաշնության դեմ նոր պատժամիջոցներ սահմանելու հնարավորությունը, ներառյալ քիմիակատների և տեխնոլոգիաների արտահանման սահմանափակումները. Ռուսաստանի Դաշնության հետ առևտրի ծավալում այս միջոցառումները գնահատվում են մոտ 5 միլիարդ եվրո։
ԵՄ-ն պատժամիջոցների նախորդ փաթեթն ընդունել է 2023 թվականի հունիսին։
