Հայաստանի հակակոռուպցիոն դատարանը որոշել է ևս երկու ամսով երկարաձգել ՀՀ կրթության նախկին նախարար Արմեն Աշոտյանի նախնական կալանքը։ Այս մասին երեքշաբթի երեկոյան ֆեյսբուքյան իր էջում գրել է նրա փաստաբան Տիգրան Աթանեսյանը։
Աշոտյանը ձերբակալվել էր, ապա կալանավորվել երկու ամիս առաջ Երևանի Մխիթար Հերացու անվան պետական բժշկական համալսարանում կատարված չարաշահումների դեպքի առթիվ հարուցված քրեական գործի շրջանակներում։ Նախաքննությունը վարում է ՀՀ ՔԿ հատկապես կարևոր գործերով գլխավոր վարչությունը։ Փաստաբանի խոսքով՝ Աշոտյանն իրեն մեղավոր չի ճանաչում և տեղի ունեցողը համարում է բացահայտ և ցինիկ քաղաքական հետապնդում։
Աշոտյանը 2005-2006 թթ աշխատել է ԵՊԲՀ ռեկտորի խորհրդական՝ կամավոր հիմունքներով; 2009-2016թթ զբաղեցրել է Հայաստանի կրթության և գիտության նախարարի պաշտոնը։ Նա այժմ Հայաստանի Հանրապետության երրորդ նախագահ Սերժ Սարգսյանի գլխավորած նախկին իշխող կուսակցության՝ Հայաստանի Հանրապետական կուսակցության փոխնախագահն է։
