ՀՀ ԱԳ նախարար Արարատ Միրզոյանը երեքշաբթի ընդունել է Կանադայի Սենատի անդամ Լեո Հուսակոսին, հայտնում է գերատեսչության մամլո ծառայությունը։
Հանդիպման ընթացքում քննարկվել են Հայաստանի և Կանադայի միջև քաղաքական երկխոսության օրակարգին առնչվող հարցեր: Արարատ Միրզոյանը գոհունակությամբ նշել է երկկողմ հարաբերություններում, ինչպես նաև տարածաշրջանում Կանադայի ներգրավվածության ավելացմանն ուղղված դրական զարգացումները՝ այս համատեքստում ընդգծելով Երևանում Կանադայի ռեզիդենտ դեսպանության բացումն ու Կանադայի մասնակցությունը ԵՄ մշտադիտարկման առաքելությանը:
Երկուստեք ընդգծվել է երկկողմ փոխգործակցության հետագա ընդլայնման ուղղությամբ շարունակական ջանքերի գործադրման կարևորությունը՝ հաշվի առնելով առկա բարեկամական ու արժեքահեն կապերը և ի աջակցություն Հայաստանի կողմից ընտրված ժողովրդավարական ուղու:
Հանդիպման ընթացքում մտքեր են փոխանակվել նաև Հարավային Կովկասում և դրա շուրջ ձևավորված անվտանգային իրավիճակի վերաբերյալ: Արարատ Միրզոյանն անդրադարձել է տարածաշրջանում կայունության հաստատման, Ադրբեջանի հետ հարաբերությունների կարգավորման ուղղությամբ ներդրվող ջանքերին, առկա մարտահրավերներին, ինչպես նաև Լեռնային Ղարաբաղի փաստացի էթնիկ զտման հետևանքով բռնի տեղահանված հայերի կարիքների և իրավունքների հասցեագրման ուղղությամբ ՀՀ կառավարության կողմից իրականացվող քայլերին:
Հոկտեմբերի 25-ին Երևանում բացվեց Հայաստանում Կանադայի դեսպանությունը։ Հայաստանում Կանադայի առաջին ռեզիդենտ դեսպան է նշանակվել Էնդրյու Թերները։
Կանադան դարձավ ԵՄ անդամ չհանդիսացող առաջին երկիրը, որը դիտորդներ ուղարկեց Հայաստան՝ միանալու Եվրոպական միության քաղաքացիական առաքելությանը (EUMA), որը մեկնարկել է այս տարվա փետրվարի 20-ին Համընդհանուր անվտանգության և պաշտպանության քաղաքականության (CSDP) շրջանակներում: Առաքելության նպատակը Հայաստանի սահմանամերձ շրջաններում իրավիճակի կայունացումն է, վստահությոն և մարդկանց անվտանգության ձևավորումը հակամարտությունից տուժած շրջաններում և ԵՄ աջակցությամբ Հայաստանի և Ադրբեջանի միջև հարաբերությունների կարգավորման համար նպաստավոր պայմանների ապահովումը։
