Հայաստանը փորձում է Լեռնային Ղարաբաղի և Ադրբեջանի միջև երկխոսության մեխանիզմ ստեղծել իրենց ապագան քննարկելու համար։ Այս մասին խորհրդարանում 2022 թվականի պետական բյուջեի կատարողականի քննարկմանն ասաց Հայաստանի արտաքին գործերի նախարար Արարատ Միրզոյանը։
«Փորձում ենք ստեղծել, ապահովել մեխանիզմ, հարթակ, միջավայր, կոչեք ինչպես ուզում եք, որտեղ Լեռնային Ղարաբաղը և Բաքուն կքննարկեն իրենց ապագան այն ծավալներով, չափերով և այն ուղղություններով, որոնք նպատակահարմար են համարում: Հայաստանը անում է. ամեն ինչ այս միջավայրն ապահովելու համար»,- ասաց նա։
Նախարարը նշեց, որ դրան պետք է միջազգային մասնակցություն լինի, քանի որ հայկական կողմը մտավախություն ունի, որ պաշտոնական Բաքուն նման գործընթաց սկսելիս ամեն ինչ կանի այն իմիտացիայի վերածելու և բովանդակալից, լուրջ քննարկումներից ու կարգավորումներից խուսափելու համար։
Միրզոյանն ասաց, որ բանակցությունների ընթացքում հայկական կողմը փորձում է Ադրբեջանին և միջազգային բոլոր գործընկերներին ցույց տալ, որ որքան էլ նրանք փորձեն խուսափել հարցի քննարկումից, ԼՂ խնդիրն օբյեկտիվորեն կա։
«Կա խնդիր, կա հակամարտության պատմություն, և եթե Հայաստանն ու Ադրբեջանը կարողանան բանակցել մնացած բոլոր կետերի շուրջ և գալ փոխադարձ ընդունելի ձևակերպումների, կարգավորել հարաբերությունները և ստորագրել պայմանագիր, եթե այս գործընթացում նշված խնդիրը (Լեռնային Ղարաբաղի) հասցեագրված չէ, չստեղծվի մեխանիզմ, որտեղ Ղարաբաղը և Բաքուն կարող են քննարկել և որոշումներ կայացնել, Հայաստանի և Ադրբեջանի միջև պայմանագիրը կարող է պարզապես չաշխատել»,- պարզաբանեց նա։
