Հայաստանի արտգործնախարար Արարատ Միրզոյանը հայտարարել է ԵՄ-ի հետ Գործընկերության նոր ծրագրի շուրջ բանակցությունների մեկնարկի մասին։
«Կարևոր է շարունակել ինտենսիվ համատեղ ջանքերը ԵՄ-ի հետ, քանի որ մենք սկսում ենք բանակցությունները նոր գործընկերության ծրագրի շուրջ»,- գրել է Միրզոյանը X սոցիալական ցանցում ԵՄ անդամ երկրների և Հայաստանում հավատարմագրված ԵՄ առաքելությունների դեսպանների հետ հանդիպումից հետո։
Նախարարը մատնանշեց Հայաստան-Եվրամիություն առաջնահերթությունները, այդ թվում՝ Բելգիայի նախագահության և Հունգարիայի առաջիկա նախագահության շրջանակներում, տարածաշրջանային թեմաներն ու խաղաղության օրակարգը։
Ավելի վաղ ՀՀ արտաքին գործերի փոխնախարար Պարույր Հովհաննիսյանը հայտարարել էր Հայաստանի և Եվրամիության միջև համագործակցության նոր փաստաթղթի մշակման մասին, որը նախատեսվում է ստորագրել հուլիսին։ Նա նշեց, որ ՀՀ-ԵՄ Համապարփակ և ընդլայնված գործընկերության համաձայնագրի (որն ուժի մեջ է մտել 2021թ. մարտի 1-ից-խմբ.) լիարժեք կիրառման դեպքում Հայաստանը կունենա ԵՄ անդամակցության պատրաստ թեկնածու երկրի կարգավիճակ։
