Սենատի արտաքին հարաբերությունների հանձնաժողովի ղեկավար Բոբ Մենենդեսը կներկայացնի օրենք՝ Ադրբեջանի նախագահ Իլհամ Ալիևին պատասխանատվության ենթարկելու Արցախի դեմ ագրեսիայի համար։
«Շատ երկար ժամանակ մենք հովանավորել ենք (Ադրբեջանի նախագահ Իլհամ) Ալիևին: Շատ երկար ժամանակ մենք բավականաչափ ամուր դիրքորոշում չենք ցուցաբերել՝ պահանջելու Լեռնային Ղարաբաղի հայերի իրավունքներ, անվտանգություն և ազատություններ: Առաջիկա օրերին ես կներկայացնեմ օրենք, որը կոչված է պատասխանատվության ենթարկել Ալիևի ռեժիմին իր ագրեսիայի համար և աջակցել Հայաստանին և Լեռնային Ղարաբաղին»,- ասել է Մենենդեսը։
Նա ընդգծել է, որ ԱՄՆ-ն չի կարող մի կոմ քաշվել, մինչ Ալիևն իրականացնում է էթնիկ զտումների իր արշավը։ «Հատկապես որ մենք որպես ազգ պարտավորվել ենք «այլևս երբեք» թույլ չտալ բռնապետերին ցեղասպանական արշավներ իրականացնել: Մենք պետք է անհապաղ աջակցություն ցուցաբերենք Լեռնային Ղարաբաղին և աշխատենք միջազգային գործընկերների հետ՝ ճնշելու Ալիևին՝ դադարեցնելու իր դաժան արշավը», - ասել է Մենենդեսը:
Ադրբեջանի ագրեսիան դատապարտող և Լեռնային Ղարաբաղում էթնիկ զտումները կանխելու համար անհապաղ միջոցներ ձեռնարկելու հայտարարությամբ հանդես են եկել նաև ԱՄՆ Ներկայացուցիչների պալատի անդամներ Ադամ Շիֆը, Գաս Բիլիրակիսը, Ֆրենկ Փալոնը և Դեյվիդ Վալադաոն։ Նրանք կոչ են արել ԱՄՆ Պետդեպարտամենտին և միջազգային գործընկերներին անհապաղ օգտագործել դիվանագիտական բոլոր գործիքները՝ դադարեցնելու ադրբեջանական ուժերի հետագա ագրեսիան և կանխելու էթնիկ զտումները Լեռնային Ղարաբաղում։
«Նախագահ Ալիևը կազմակերպել է այս կանխամտածված հարձակումը Լեռնային Ղարաբաղի հայ բնակչությանը վտարելու նպատակով։ Այսպես կոչված «մարդասիրական միջանցքները», որոնք նրանք բացել են խաղաղ բնակիչների համար, կոչված են միայն շարունակելու էթնիկ զտումների արշավը, բռնության, սովի և վախի միջոցով հարկադրելու նրանց լքել հայրենիքը: Հայերը հազարամյակներ շարունակ Լեռնային Ղարաբաղը տուն են կոչել»,- ասվում է կոնգրեսականների հայտարարության մեջ:
