Երևանի քաղաքապետի ընտրություններում իշխող «Քաղաքացիական պայմանագիր» կուսակցության նախընտրական շտաբը կգլխավորի ՀՀ արտակարգ իրավիճակների նախկին նախարար Արմեն Փամբուխչյանը։
«Ինչպես գիտեք, առաջիկայում սպասվում են Երևանի ավագանու ընտրություններ։ Ընտրական շտաբի ղեկավարումն ինձ են վստահել»,- կառավարության նիստից հետո լրագրողների հետ զրույցում ասաց ԱԻՆ նախկին ղեկավարը։
Նրա խոսքով, Երևանի ընտրությունները կարևորագույն նշանակություն ունեն։
«Այնպես որ, ես ընդհանրապես վիրավորված չեմ այս որոշումից»,- ասաց Փամբուխչյանը՝ պատասխանելով իր փաստացի պաշտոնանկության մասին հարցին։
Նախկին նախարարը նախատեսում է վաղվանից սկսել նախապատրաստական աշխատանքները։
«Մեր կողմից անցկացված հարցման համաձայն՝ ՔՊ-ն՝ ի դեմս փոխքաղաքապետ Տիգրան Ավինյանի, բավականին բարձր վարկանիշ ունի»,- ասաց Փամբուխչյանը։
Մայրաքաղաքի քաղաքապետի ընտրությունները տեղի կունենան այս տարվա սեպտեմբերին։ Հայաստանի մայրաքաղաքում քաղաքապետի աթոռը թափուր է այս տարվա մարտի 17-ին նախկին քաղաքապետ Հրաչյա Սարգսյանի հրաժարականից հետո։ Նրա պարտականությունները ժամանակավորապես կատարում է առաջին փոխքաղաքապետ Լևոն Հովհաննիսյանը։
Ապրիլի 11-ի Երևանի ավագանու արտահերթ նիստը՝ նվիրված քաղաքապետի ընտրությանը, չկայացավ քվորումի բացակայության պատճառով։ Դրանից մեկ շաբաթ առաջ ավագանու իշխող «Իմ քայլը» խմբակցության անդամները հայտարարեցին քաղաքապետի իրենց թեկնածուի բացակայության և ապրիլի 11-ի ընտրություններին չմասնակցելու մտադրության մասին։
