Նոյեմբերի 15-ին Բրյուսելում ՀՀ ԱԳ նախարար Արարատ Միրզոյանը հանդիպել է ԵՄ հարևանության և ընդլայնման հարցերով hանձնակատար Օլիվեր Վարհեիի հետ:
Հանդիպման ընթացքում քննարկվել են ՀՀ-ԵՄգործընկերության ընդգրկուն օրակարգի հարցեր: Զրուցակիցները մտքեր են փոխանակել առկա երկխոսության և փոխադարձ հետաքրքրություն ներկայացող ոլորտներում համագործակցության ընդլայնման հնարավորությունների շուրջ:
ՀՀ ԱԳ նախարարը ներկայացրել է նաև «Խաղաղության խաչմերուկ» նախագիծը, որը ոչ միայն կարող է տնտեսական առավելություններ տալ տարածաշրջանի երկրներին, այլև դառնալ խաղաղության կարևոր երաշխիք: Անդրադարձ է կատարվել Հայաստանի և Ադրբեջանի միջև հարաբերությունների կարգավորման ուղղությամբ միջազգային ջանքերին:
Կողմերը քննարկել են նաև Ադրբեջանի կողմից ԼՂ-ում էթնիկ զտման հետևանքով բռնի տեղահանված 100 հազարից ավել հայ փախստականների կարիքների և իրավունքների հասցեագրման հարցերին, այդ թվում նաև միջազգային գործընկերների աջակցությամբ իրականացվող քայլերին:
«Խաղաղության խաչմերուկ» նախագծի մասին
2023 թվականի հոկտեմբերին Թբիլիսիում «Մետաքսի ճանապարհ» ֆորումի շրջանակներում Փաշինյանը ներկայացրել է տարածաշրջանային հաղորդակցությունների բացման «Խաղաղության խաչմերուկ» նախագիծը՝ խաղաղության օրակարգի կարևոր բաղադրիչ անվանելով բաց սահմանները, տնտեսական, քաղաքական և մշակութային կապերը։ Նա, մասնավորապես, հայտարարել է, որ առաջիկայում հանրապետությունում կստեղծվի հատուկ ստորաբաժանում, որը պատասխանատու կլինի Հայաստանով անցնող միջազգային հաղորդակցման ուղիներով բեռների, տրանսպորտային միջոցների և մարդկանց անցման անվտանգության ապահովման համար։
Արցախում Ադրբեջանի էթնիկ զտումների մասին
Սեպտեմբերի 19-20-ը Ադրբեջանը լայնածավալ ագրեսիա ձեռնարկեց Արցախի դեմ՝ օգտագործելով հրետանի, անօդաչու թռչող սարքեր և ռազմական ինքնաթիռներ։ Սեպտեմբերի 28-ին ադրբեջանական կողմի հետ բանակցություններից հետո Արցախի նախագահ Սամվել Շահրամանյանը հրամանագիր է ստորագրել հանրապետության բոլոր պետական կառույցները լուծարելու մասին։ 2024 թվականի հունվարի 1-ից Արցախի Հանրապետությունը կդադարի գոյություն ունենալ.
Արցախի բնակիչները հարկադրաբար լքել են հայրենիքն ու տեղափոխվել Հայաստան. ՀՀ կառավարության տվյալներով՝ հաշվառված և գրանցված է ավելի քան 108 հազար արցախցի։ Մեծամասնությունն արդեն ստացել է 100 հազար դրամ միանվագ նպաստ։ Առաջիկայում կսկսվեն 50 հազարական դրամի վճարումները վարձակալության (միայն Հայաստանում անշարժ գույք չունեցող անձանց համար) և կոմունալ ծախսերի համար։ Գործարկվել է առաջնային կարիքների https://e-soc.am հարթակը և ՀՀ սոցապ նախարարության «114» թեժ գիծը։
