Կիպրոսն ու Հայաստանը պետք է պատրաստ լինեն արձագանքելու չնախատեսված մարտահրավերներին։ Այդ մասին ՀՀ պաշտպանության նախարար Սուրեն Պապիկյանի հետ հանդիպումից հետո լրագրողներին ասել է Կիպրոսի պաշտպանության նախարար Միխալիս Յորգալասը։
«Բացի սովորական և կանխատեսելի սպառնալիքների դեմ պայքարից՝ մեր երկրները պետք է զարգացնեն նոր և չնախատեսված մարտահրավերներին արդյունավետ արձագանքելու իրենց պատրաստականությունը: Մեր երկրների ռազմական համագործակցության ամենամյա ծրագրի իրականացումը մեր պաշտպանությունը և նախարարությունների ու զինված ուժերի միջև ռազմական համագործակցությունն ամրապնդելու պատրաստակամության շոշափելի ապացույց է»,- ասել է Յորգալասը, փոխանցում է ՏԱՍՍ-ը:
«Ես նաև հնարավորություն ունեցա նախարար Պապիկյանին տեղեկացնելու Կիպրոսի և Արևելյան Միջերկրական ծովի անվտանգային իրավիճակը, ինչպես նաև Թուրքիայի հիբրիդային ռազմական գործողությունների մասին, մասնավորապես՝ կղզում և տարածաշրջանում անօրինական միգրացիայի կիրառման միջոցով», - հավելել է նա։
Անդրադառնալով վերջերս Հայաստանի և Ադրբեջանի համատեղ հայտարարությանը՝ Յորգալասն ընդգծել է, որ այդ նախաձեռնությունը պատմական հնարավորություն է տարածաշրջանում երկար սպասված խաղաղության հասնելու համար՝ հիմնված միջազգային իրավունքի սկզբունքների, մասնավորապես՝ ինքնիշխանության և տարածքային ամբողջականության սկզբունքների հարգանքի վրա:
Սուրեն Պապիկյանն իր հերթին ասել է, որ գործընկերոջ հետ քննարկել է պաշտպանության և անվտանգության ոլորտում համագործակցության զարգացման հարցեր։ Նա նշել է, որ Կիպրոսն ու Հայաստանն այսօր բախվում են ընդհանուր սպառնալիքների և միավորում են ուժերը դրանց դեմ պայքարելու համար։
«Սա վկայում է, որ երկու երկրները ոչ միայն բարեկամներ են, այլ նաև դաշնակիցներ»,- ընդգծել է նա։
