Ռուսաստանի արտգործնախարարության խոսնակ Անդրեյ Նաստասինը Վաշինգտոնում ՆԱՏՕ-ի գագաթնաժողովին Հայաստանի և Ադրբեջանի հրավերն անվանել է ԱՄՆ-ի կողմից «ընկերներին և հարևաններին Ռուսաստանի հետ համագործակցությունից պոկելու փորձ»:
«Դաշինքի մերձավոր ենթադրյալ գործընկերների լայն շրջանակի գագաթնաժողովի հրավերը նպատակ ունի առավելագույն աջակցություն ցուցաբերել ՆԱՏՕ-ին կազմակերպության հոբելյանական տարում: Միևնույն ժամանակ, արևմուտքցիները հույս ունեն անել այն, ինչ չկարողացան անել, այսպես կոչված, Բյուրգենստոկում կայացած խաղաղության համաժողովում. հստակ ցույց տալ, թե ինչպես են իրենց ագրեսիվ քաղաքականությունն իբր հավանության արժանանում Եվրատլանտյան տարածաշրջանից դուրս գտնվող երկրների կողմից», - ասել է Նաստասինը:
Նրա խոսքով, Հայաստանին զենքով «պոմպացնելը» խորացնում է լարվածությունը Հարավային Կովկասում և հրահրում սպառազինությունների մրցավազք տարածաշրջանում։ Դիվանագետը վստահեցրել է, որ Վաշինգտոնը չի հասկանում տարածաշրջանի առանձնահատկությունները, հետևաբար նրա միջամտությունը հանգեցնում է նոր բաժանարար գծերի ի հայտ գալուն և կործանարար հետևանքներ կունենա ոչ միայն Հարավային Կովկասի, այլև ամբողջ Եվրասիական անվտանգության համար։
«Կայունությունը և անվտանգությունը Հարավային Կովկասում կարող են և պետք է ապահովեն իրենք՝ տարածաշրջանի երկրները՝ տարածաշրջանային պատասխանատվության սկզբունքի շրջանակներում», - եզրափակել է Նաստասինը։
Վաշինգտոնում ՆԱՏՕ-ի գագաթնաժողովը տեղի կունենա հուլիսի 9-11-ը և նվիրված կլինի դաշինքի 75-ամյակին։ Ըստ ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ'Բրայենի, ԱՄՆ պետքարտուղար Անտոնի Բլինկենը գագաթնաժողովի շրջանակներում միջոցառում կկազմակերպի ՆԱՏՕ-ի գործընկեր երկրների, այդ թվում՝ Ադրբեջանի և Հայաստանի համար։ Հայաստանի արտգործնախարարության մամուլի քարտուղար Անի Բադալյանը հունիսի 28-ին Armenia Today-ին ասել է, որ Երևանը հաստատել է իր մասնակցությունը գագաթնաժողովին։
