Ռուսաստանի արտգործնախարարության պաշտոնական ներկայացուցիչ Մարիա Զախարովան երեքշաբթի օրը կայացած ճեպազրույցում մեկնաբանել է Հայաստանի վարչապետ Նիկոլ Փաշինյանի վերջին հայտարարությունները։
Ի պատասխան խնդրանքին՝ մեկնաբանել Փաշինյանի հայտարարությունը, որում նա սխալ է անվանել անվտանգության ոլորտում Ռուսաստանից կախվածությունը, Զախարովան ասել է, որ կմեկնաբանի ոչ թե կոնկրետ այդ, այլ վերջին շրջանում Փաշինյանի բոլոր հայտարարությունները։
«Հայաստանի վարչապետը վերջին օրերին քիչ բան չի ասել։ Պարզապես ամփոփելով այդ բոլոր հայտարարությունները՝ ուզում եմ ասել, որ պետք է կարողանալ պատասխան տալ սեփական արարքների համար, այլ ոչ թե մեղավորներ փնտրել և դա անել անընդհատ, ամեն առիթով։ Պետք է պատասխանատվություն կրել, սեփական պատասխանատվությունը, այլ ոչ թե ուրիշի ուսերին բարդել»,- ասել է ՌԴ ԱԳՆ պաշտոնական ներկայացուցիչ Մարիա Զախարովան։
Նա նշել է, որ, սրանով է քաղաքական գործիչը, պետական գործիչը տարբերվում պատահական մարդուց, որը չի մտածում իր երկրի ազգային շահերի մասին։
Վերջերս իտալական La Repubblica-ին տված հարցազրույցում Փաշինյանը, մասնավորապես, հայտարարեց, որ «Ռուսաստանի խաղաղապահ ուժերը Ղարաբաղում չեն կատարում 2020 թվականի նոյեմբերի 9-ի եռակողմ հայտարարությամբ ստանձնած առաքելությունը», ինչպես նաև, որ «Ռուսաստանը հենց իր կողմից ձեռնարկվող կամ չձեռնարկվող քայլերի բերումով ինքն է հեռանում տարածաշրջանից»։
