Կառավարությունը Միջազգային քրեական դատարանի Հռոմի կանոնադրությունը (Հռոմի ստատուտ) առաջիկայում կներկայացնի Ազգային ժողովի վավերացմանը: Այս մասին «Արմենպրեսին» տեղեկացրին վարչապետի աշխատակազմի տեղեկատվության և հասարակայնության հետ կապերի վարչությունից։
ՄՔԴ Հռոմի ստատուտի սահմանադրականությունը
Հայաստանը Հռոմի ստատուտը ստորագրել է 1998 թվականի հուլիսի 17-ին, սակայն չի վավերացրել այն, քանի որ 2004 թվականին Սահմանադրական դատարանը ճանաչեց պայմանագրի պարտավորությունները հակասող այն ժամանակ գործող Սահմանադրության մի շարք դրույթների։
Հայաստանի կառավարությունը 2022 թվականի վերջին Հռոմի ստատուտի սահմանադրականությունը ստուգելու հարցով դիմել է Սահմանադրական դատարան։ Երևանը նշել է, որ այս փաստաթղթի վավերացումը թույլ կտա ՄՔԴ-ում վարույթ հարուցել Ադրբեջանի դեմ (Արցախում և Հայաստանում ռազմական հանցագործությունների համար - խմբ.):
2023 թվականի մարտի 24-ին ՀՀ Սահմանադրական դատարանը ճանաչել է Սահմանադրությանը համապատասխանող Միջազգային քրեական դատարանի Հռոմի կանոնադրությունում ամրագրված պարտավորությունները։
Այս տարվա մարտի 17-ին ՄՔԴ-ն ՌԴ նախագահ Վլադիմիր Պուտինին ձերբակալելու որոշում է կայացրել։ Դրանից հետո իշխող «Քաղաքացիական պայմանագիր» խմբակցության պատգամավոր Գուրգեն Մելքոնյանը հայտարարել է, որ Հռոմի ստատուտի վավերացումից հետո ՌԴ նախագահը Հայաստան այցելելու դեպքում կձերբակալվի։ Հայաստանի Ազգային ժողովի նախագահ Ալեն Սիմոնյանը անհեթեթ է համարել ՌԴ նախագահ Վլադիմիր Պուտինին երկիր ժամանելու դեպքում ձերբակալելու հնարավորությունը։
