Հայաստանի արտգործնախարարության ղեկավար Արարատ Միրզոյանը հեռախոսազրույց է ունեցել Պաղեստինի վարչապետ, արտաքին գործերի և սփյուռքի նախարար Մուհամմեդ Մուստաֆայի հետ, ով շնորհակալություն է հայտնել Երևանին՝ Պաղեստինի ճանաչման հարցում ցուցաբերած սկզբունքային մոտեցման համար։
ՀՀ ԱԳՆ մամուլի ծառայությունից հայտնում են, որ Միրզոյանն ընդգծել է, որ Հայաստանի որոշումը պայմանավորված է «երկու պետություն» սկզբունքով ստեղծված իրավիճակի կարգավորման հարցում հետևողական դիրքորոշմամբ։
Կողմերը քննարկել են նաև երկկողմ հարաբերությունների զարգացման և քաղաքական երկխոսության հարցեր։
Հունիսի 21-ին Հայաստանի արտգործնախարարությունը հայտարարեց Պաղեստին պետության ճանաչման մասին՝ հաստատելով Երևանի հավատարմությունը միջազգային իրավունքին և ժողովուրդների իրավահավասարության, ինքնիշխանության և խաղաղ գոյակցության սկզբունքներին։
