Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարն իր մտահոգությունն է հայտնել հայ-ադրբեջանական սահմանին հրադադարի խախտման կապակցությամբ։
«ԵՄ-ն ուշադրությամբ հետևում է տարածաշրջանում տեղի ունեցող իրադարձություններին: Պետք է դադարեցվեն կրակոցները բոլոր ուղղություններով: Կարևոր է շարունակել հաջորդական հանդիպումների դրական դինամիկան և բանակցությունների սեղանի շուրջ հասնել այնպիսի արդյունքների, որոնք օգուտ կբերեն Հայաստանին, Ադրբեջանին և ողջ տարածաշրջանին», - գրել է Տոյվո Կլաարը թվիթերյան միկրոբլոգում։
Երեկ և այսօր ադրբեջանական զինուժը տարբեր տրամաչափի հրաձգային զինատեսակներից մի քանի անգամ կրակ է բացել Երասխ գյուղի մերձակայքում տեղակայված հայկական դիրքերի, ինչպես նաև քաղաքացիական օբյեկտի և ավտոմեքենայի ուղղությամբ։ Այսօրվա հրետակոծության հետեւանքով վիրավորվել են Երասխում գործարանի շինարարական աշխատանքներում ներգրավված Հնդկաստանի երկու քաղաքացի, նրանց վիրահատել են։
