Եվրախորհրդարանում հայտարարել են, որ պետք է դադարեցնել Եվրամիությանը Թուրքիայի անդամակցության գործընթացը
Եվրախորհրդարանի առաջատար խմբակցության՝ Եվրոպական ժողովրդական կուսակցության (ԵԺԿ) ղեկավար Մանֆրեդ Վեբերը կարծում է, որ ոչ ԵՄ-ն, ոչ Թուրքիան այլևս չեն ցանկանում, որ երկիրն անդամակցի Եվրամիությանը։
«Վերջին տարիները ցույց տվեցին, որ [ԵՄ-ի և Թուրքիայի միջև] սերտ գործընկերությունը կարևոր է, բայց ոչ ոք չի ցանկանում Թուրքիայի լիիրավ անդամակցությունը ԵՄ-ին՝ ոչ Թուրքիան, ոչ ԵՄ-ն»,- ասել է Վեբերը երկուշաբթի օրը Funke լրատվամիջոցին տված հարցազրույցում, մեկնաբանելով նախագահական ընտրությունների երկրորդ փուլում Թայիփ Էրդողանի հաղթանակը։
«Մենք պետք է դադարեցնենք այդ գործընթացը, քանի որ այն ավելի շուտ արգելափակում է, քան աջակցում հարաբերությունների բարելավմանը»,- կարծում է քաղաքական գործիչը, փոխանցում է ՏԱՍՍ-ը։ Անդամակցության բանակցությունները մեկնարկել են 2005 թվականին, սակայն այժմ գործնականում սառեցված են արդեն մի քանի տարի:
Վեբերի խոսքով՝ ԵՄ-ն բաց է իր անմիջական հարևանների հետ հետագա համագործակցության համար։ «Սակայն ակնկալիքները պարզ են. Էրդողանը պետք է միավորի և արդիականացնի երկիրը: Մեզ անհրաժեշտ է համագործակցություն Ուկրաինայի և Ռուսաստանի միջև խաղաղության հասնելու, միգրացիոն քաղաքականության, տնտեսական արդիականացման և Կիպրոսի հարցում»,- ընդգծել է ԵԺԿ խմբակցության ղեկավարը: «Այժմ Էրդողանը պետք է անհապաղ հավանություն տա Շվեդիայի անդամակցությանը ՆԱՏՕ-ին»,- ասել է Վեբերը։
Թուրքիայի Գերագույն ընտրական խորհուրդը (ԿԸՀ) նախնական արդյունքներով ճանաչել է Էրդողանի հաղթանակը նախագահական ընտրությունների երկրորդ փուլում։
