ԱՄՆ Պետդեպարտամենտի մամուլի ծառայության ղեկավար Մեթյու Միլլերը Վաշինգտոնում հայ-ադրբեջանական բանակցություններն արդյունավետ է անվանել, հայտնում է Հայաստանի Հանրային հեռուստատեսությունը։
«Մենք կարծում ենք, որ բանակցություններն արդյունավետ էին։ Պետքարտուղար Բլինքենն այսօր կրկին երկկողմ բանակցություններ է վարել արտգործնախարարների հետ։ Նա նաև կանցկացնի ևս մեկ եռակողմ հանդիպում»,- ասել է նա հինգշաբթի օրը կայացած ճեպազրույցում։
Բանակցություններն ԱՄՆ-ում
Հունիսի 27-29-ը Վաշինգտոնում կայացել է հայ-ադրբեջանական բանակցությունների հերթական փուլը։ Առաջին օրը պետքարտուղար Բլինքենը հանդիպել է Հայաստանի և Ադրբեջանի արտգործնախարարների հետ, տեղի են ունեցել նաև եռակողմ բանակցություններ։ Հունիսի 28-ին ՀՀ ԱԳ նախարար Արարատ Միրզոյանի հանդիպմանը ԱՄՆ ազգային անվտանգության հարցերով խորհրդական Ջեյք Սալիվանի հետ ներկա է եղել Ադրբեջանի արտգործնախարար Ջեյհուն Բայրամովը։ Հունիսի 29-ին կրկին տեղի է ունեցել Բլինքենի երկկողմ և եռակողմ հանդիպումները Միրզոյանի և Բայրամովի հետ։
Բանակցություններից հետո Հայաստանի ԱԳՆ-ն հայտարարել է, որ կողմերը համաձայնության են հասել «Խաղաղության և միջպետական հարաբերությունների հաստատման մասին» համաձայնագրի նախագծի ևս մի քանի հոդվածների շուրջ և գրացել փոխըմբռնման առաջընթաց՝ միևնույն ժամանակ արձանագրելով, որ մի քանի առանցքային հարցերի շուրջ դիրքորոշումները պահանջում են հետագա աշխատանք:
